Antalya (Banaadir24) — Ra’iisul Wasaaraha dalka Itoobiya, Abiy Axmed, iyo Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa kulan ku yeeshay magaalada Antalya ee dalka Turkiga, xilli ay halkaasi ka socoto qabanqaabada shir-madaxeedka hoggaamiyeyaasha caalamka ee COP31.
Kulanka labada hoggaamiye ayaa diiradda lagu saaray xaaladda amniga Soomaaliya iyo horumarrada guud ee ka jira gobolka.
Sida ay baahisay Wakaaladda Wararka Itoobiya (ENA), Abiy Axmed iyo Xasan Sheekh ayaa kulankooda ku kala qaatay aragtiyo ku saabsan xaaladda amni ee Soomaaliya iyo caqabadaha gobolka, iyagoo carrabka ku adkeeyey muhiimadda ay leedahay sii wadista wada-hadalka iyo iskaashiga.
Ra’iisul Wasaare Abiy Axmed ayaa qoraal uu ku baahiyey bartiisa X ku sheegay inuu Madaxweynaha Soomaaliya kala hadlay xaaladda amniga dalka iyo arrimaha gobolka, isagoo xusay muhiimadda iskaashiga labada dhinac u leeyahay horumarinta nabadda iyo xasilloonida gobolka.
Kulankan ayaa kusoo beegmaya xilli Madaxweynaha Xasan Sheekh Maxamuud uu dalka Turkiga u joogo ka qaybgalka shirka COP31, kaas oo ay isugu imaanayaan hoggaamiyeyaal iyo wufuud caalami ah.
Warbixinta laga soo saaray kulanka ma sheegin heshiis cusub ama go’aanno gaar ah oo ay labada hoggaamiye gaareen.
