Ciidamo ka tirsan Macawiisleyda gobolka Hiiraan ayaa weerar qorsheysan ku qaaday maleeshiyaad ka tirsan Al-Shabaab oo ku sugnaa deegaanka Tardo, kaas oo hoostaga degmada Moqokori ee gobolka Hiiraan.
Weerarkan ayaa la sheegay inuu ka dhacay goob ay maleeshiyaadku dadka shacabka ah kaga qaadi jireen lacagaha baadda ah, taas oo dhibaato weyn ku haysay bulshada deegaanka. Sida ay wararku sheegayaan, ciidamada Macawiisleyda ayaa si lama filaan ah u weeraray fariisinka maleeshiyaadka, waxaana halkaasi ka dhacay dagaal kooban oo khasaare sababay.
Inta la xaqiijiyay, tiro ka mid ah maleeshiyaadkii Al-Shabaab ayaa lagu dilay weerarka, halka kuwo kalena ay goobta ka baxsadeen. Sidoo kale, ciidamada Macawiisleyda ayaa gacanta ku dhigay hub kala duwan oo ay lahaayeen maleeshiyaadka, kuwaas oo isugu jiray qoryo iyo rasaas.
Hoggaamiyeyaasha Macawiisleyda ee howlgalka hoggaaminayay ayaa warbaahinta u sheegay in weerarkan uu qeyb ka yahay dadaallada joogtada ah ee lagu ciribtirayo maleeshiyaadka Al-Shabaab ee ku dhuumaaleysanaya deegaannada gobolka Hiiraan.
Waxay sidoo kale sheegeen inay sii wadi doonaan howlgallada ka dhanka ah Al-Shabaab ilaa laga xaqiijinayo amniga guud ee gobolka, isla markaana laga xoreynayo goobaha ay kaga sugan yihiin.
Dadka deegaanka ayaa soo dhaweeyay weerarkan, iyagoo sheegay in uu yareynayo culeyskii iyo caburintii ay kala kulmi jireen maleeshiyaadka, gaar ahaan lacagaha baadda ah ee si qasab ah looga qaadi jiray shacabka.
Weerarkan ayaa kusoo beegmaya xilli ay sii xoogeysanayaan howlgalada ay iska kaashanayaan ciidamada deegaanka iyo kuwa dowladda Soomaaliya, kuwaas oo lagu doonayo in lagu wiiqo awoodda Al-Shabaab ee gobollada dhexe ee dalka.
