Mas’uul sare oo ka tirsan dowladda Soomaaliya ayaa sheegay in Israa’iil ay horraantii sanadkan ciidamo kooban geysay Somaliland, sida uu qoray wargeyska Middle East Eye.
Sida lagu sheegay warbixinta, tallaabadan ayaa la sheegay inay timid kadib markii Israa’iil ay bishii December si rasmi ah u aqoonsatay Somaliland, isla markaana bishii April ay u magacowday safiirkeedii ugu horreeyay ee Hargeysa, Michael Lotem.
Mas’uulka Soomaaliga ah ayaa sheegay in warbixinno sirdoon ay muujinayaan in ku dhowaad 50 askari oo Israa’iiliyiin ah loo diray Somaliland, kuwaas oo la sheegay in badankoodu ahaayeen askar asal ahaan Afrikaan ah, gaar ahaan Itoobiyaan, si aysan u soo jiidan dareen badan isla markaana ay si fudud ula jaanqaadaan bulshada deegaanka.
Ciidamada Israa’iil ayaa diiday inay faahfaahin ka bixiyaan eedeymahan, iyagoo sheegay in arrintu ay quseyso dhinaca siyaasadda. Dhanka kale, maamulka Somaliland ayaan si rasmi ah uga jawaabin warbixinta.
Wasiirka Difaaca Israa’iil, Israel Katz, ayaa dhawaan sheegay in Israa’iil iyo Somaliland ay muddo dheer si qarsoodi ah uga wada shaqeynayeen arrimo amni iyo hawlgallo kala duwan, isagoo xusay in labada dhinac ay doonayaan inay sare u qaadaan iskaashigooda amni.
Warar hore oo ay baahisay CNN ayaa sidoo kale sheegay in Somaliland ay Israa’iil siisay goob militari oo dheeraad ah, taasoo suuragal ka dhigi karta in diyaaradaha Israa’iil ay halkaas ka sameeyaan hakad inta lagu jiro duullimaadyada masaafo dheer.
Dhanka kale, Wasiirka Gaashaandhigga Somaliland Maxamed Yuusuf Cali ayaa sheegay in Israa’iil aysan saldhig militari ku lahayn Somaliland, balse wuxuu qiray in Israa’iil ay taageero siiso Somaliland, gaar ahaan dhinacyada tababarka ciidamada booliiska iyo kuwa milatariga.
Ilaa hadda ma jiraan caddeymo madax-bannaan oo si rasmi ah u xaqiijinaya jiritaanka ciidamo Israa’iiliyiin ah oo ku sugan Somaliland.
