Waqooyiga Kuuriya ayaa ku dhawaaqday inay taageerayso magacaabista Mojtaba Khamenei oo loo doortay hoggaamiyaha ugu sarreeya ee Iran, iyadoo sidoo kale si adag u cambaareysay weerarrada militari ee ay Iran ku qaadeen Maraykanka iyo Israa’iil.
Warbaahinta dowladda ee Korean Central News Agency (KCNA) ayaa Arbacadii soo xigatay afhayeen ka tirsan Wasaaradda Arrimaha Dibadda ee Waqooyiga Kuuriya oo sheegay in Pyongyang ay ixtiraamayso go’aanka ay shacabka Iran ku doorteen hoggaamiyahooda cusub.
Afhayeenka ayaa sheegay in doorashada Mojtaba Khamenei ay tahay go’aan ay gaareen hay’adaha sharci-dejinta ee Iran, isla markaana Waqooyiga Kuuriya ay ixtiraamayso xaqa ay dadka reer Iran u leeyihiin inay doortaan hoggaamiyahooda sare.
Mojtaba Khamenei ayaa xilka la wareegay kadib markii la dilay hoggaamiyihii hore ee Iran Ayatollah Ali Khamenei, kaas oo lagu dilay weerarro ay si wadajir ah u qaadeen Maraykanka iyo Israa’iil 28-kii Febraayo, xilli uu bilaabmay dagaalka ka socda gobolka.
Dowladda Waqooyiga Kuuriya ayaa sidoo kale si kulul u cambaareysay weerarrada Maraykanka iyo Israa’iil, iyadoo ku tilmaantay “weerar militari oo sharci-darro ah” oo wiiqaya nabadda iyo amniga gobolka isla markaana kordhinaya xasillooni darrada caalamka.
Hadalka Pyongyang ayaa imaanaya iyadoo dagaalka Iran iyo xulafada Maraykanka uu galay maalmo badan, xaaladda gobolka Bariga Dhexe-na ay sii kordheyso xiisaddiisa siyaasadeed iyo militari.
Dhanka kale, warbaahinta Waqooyiga Kuuriya ayaa sidoo kale sheegtay in hoggaamiyaha dalka Kim Jong Un uu kormeeray tijaabo lagu riday gantaallo cruise ah oo laga soo tuuray burburiyaha badeed ee ugu weyn ee ciidamada badda ee dalkaas.
