Ilo wareedyo kala duwan ayaa sheegaya in madaxtooyada Villa Somalia ay go’aansatay inay qaaddo tallaabooyin siyaasadeed oo la xiriira khilaaf la sheegay inuu kala dhexeeyo Madaxweynaha Koonfur Galbeed State, Cabdicasiis Xasan Maxamed (Laftagareen).
Sida ay sheegeen ilo lagu kalsoonaan karo, masuuliyiin ka tirsan Dowladda Federaalka Soomaaliya oo la rumeysan yahay inay mucaarad ku yihiin Laftagareen ayaa lala wadaagay saddex amar oo la doonayo in si degdeg ah loo fuliyo, waxaana tallaabooyinka la sheegay in la qorsheeyey ka mid ah:
-
Waxaa la sheegay in maamulka kastamka ee degmada Afgooye lagu wareejin doono dowladda federaalka, si loo xakameeyo ilo dhaqaale oo ay hesho magaalada Baydhabo.
-
Masuuliyiinta ka tirsan dowladda federaalka ee ku sugan Baydhabo ayaa lagu amray inay maalmo gudahood kusoo xaroodaan magaalada Muqdisho, iyadoo la sheegay in cid kasta oo diidda amarkaasi laga qaadi doono xilka.
-
Ilo wareedyadu waxay sidoo kale sheegayaan in xubno ka tirsan baarlamaanka, senatarro iyo masuuliyiin kale oo ka soo jeeda Koonfur Galbeed oo ku sugan Muqdisho laga joojin doono safarrada ay ugu baxayaan deegaanada Koonfur Galbeed.
Wararkaan ayaa imaanaya xilli ay jiraan hadal-heyn siyaasadeed oo la xiriirta xiriirka u dhexeeya dowladda federaalka iyo maamulka Koonfur Galbeed. Illaa iyo hadda ma jiro war rasmi ah oo ka soo baxay Dowladda Federaalka Soomaaliya ama xafiiska Madaxweynaha Koonfur Galbeed oo arrintan xaqiijinaya ama ka hadlaya.
