Soomaaliya oo xoojinaysa dagaalka Argagixisada & wafdi ka socda Isbahaysiga IMCTC oo Muqdisho soo gaaray
Kaaliyaha Taliska Ciidanka Xoogga Dalka Soomaaliyeed, Sarreeye Guuto Madey Nurey Sheekh Ufurow, ayaa maanta magaalada Muqdisho ku soo dhaweeyay Xoghayaha Guud ee Isbahaysiga Islaamiga ah ee Ciidamada La-dagaallanka Argagixisada (IMCTC), Sareeye Gaas Maxamed bin Saciid Al-Moghidi, iyo wafdi uu hoggaaminayo oo booqasho rasmi ah ku yimid Soomaaliya.
Booqashada wafdigan ayaa xambaarsan ajande ka ballaaran kulan diblomaasiyadeed oo caadi ah. Sida lagu sheegay xogta Wasaaradda Gaashaandhigga Soomaaliya, Al-Moghidi ayaa inta uu Muqdisho joogo ka qeyb geli doona daahfurka dhowr mashruuc oo IMCTC ay ka fulinayso Soomaaliya, sidoo kalena wuxuu kulamo la yeelan doonaa mas’uuliyiin ka tirsan hay’adaha difaaca iyo amniga dalka. Kulamadaas ayaa diiradda lagu saari doonaa xoojinta iskaashiga Soomaaliya iyo IMCTC ee dhinaca la-dagaallanka argagixisada.
IMCTC waa isbahaysi caalami ah oo xaruntiisu tahay Riyaad, kaas oo diiradda saaraya isku-duwidda dadaallada dalalka xubnaha ka ah ee ka dhanka ah argagixisada iyo xagjirnimada. Soomaaliya waxay ka mid tahay dalalka ku jira isbahaysiga, waxaana horey u jiray xiriir iyo iskaashi u dhexeeya Muqdisho iyo xarunta IMCTC ee Sacuudiga.
Sannadkii 2024, Soomaaliya waxay xarunta IMCTC ee Riyaad u dirtay wakiil rasmi ah, Sarreeye Guuto Cabdiraxmaan Maxamed Tuurrey, taas oo IMCTC ku tilmaantay tallaabo muhiim ah oo muujinaysa ka-qaybgalka Soomaaliya ee dadaallada caalamiga ah ee ka dhanka ah argagixisada.
Sidoo kale, xiriirka labada dhinac wuxuu gaaray heer sare bishii Febraayo 2026, markii Wasiirka Gaashaandhigga Soomaaliya Axmed Macallin Fiqi uu magaalada Riyaad kulan kula yeeshay Xoghayaha Guud ee IMCTC. Kulankaas waxaa looga hadlay arrimo ay ka mid yihiin amniga Badda Cas iyo Gacanka Cadmeed, isku-duwidda amniga Geeska Afrika iyo horumarinta iskaashiga la-dagaallanka argagixisada.
