Dowladda Soomaaliya ayaa sheegtay in burcad-badeednimada ka jirta xeebaha dalka aysan ahayn oo keliya dhibaato amni oo ku kooban biyaha Soomaaliya, balse ay saameyn ballaaran ku leedahay dhaqaalaha dalka, bulshada xeebaha, kalluumeysiga iyo ganacsiga caalamiga ah.
Dowladdu waxay sheegtay in burcad-badeednimadu dhaawacday sumcadda Soomaaliya, caqabadna ku noqotay horumarinta dhaqaalaha badda iyo kalluumeysiga sharciga ah, iyadoo sidoo kale khatar gelisay bulshooyinka ku nool xeebaha iyo amniga maraakiibta.
Heer caalami, Soomaaliya waxay sheegtay in burcad-badeednimadu kordhisay kharashaadka gaadiidka badda, caymiska iyo ilaalinta maraakiibta, iyadoo badmaaxiin badan ay la kulmeen afduub, rabshado iyo muddo dheer oo ay gacanta ugu jireen kooxaha burcad-badeedda.
Sida lagu sheegay qoraalka, cilmi-baaris uu sameeyey Bangiga Adduunka ayaa qiyaastay in burcad-badeednimada Soomaaliya ay muddadii daraasadda ku kacday dhaqaalaha caalamka kharash gaaraya ilaa $18 bilyan sanadkii.
Dowladda ayaa sidoo kale xustay tallaabooyinka sharciyeed ee Baarlamaanka Federaalka Soomaaliya uu qaaday.
Golaha Shacabka ayaa 10-kii Nofeembar 2025 ansixiyey Hindise-Sharciyeedka Dib-u-eegista Sharciga La-dagaallanka Burcad-badeedda iyo Ka-hortagga Afduubka, halka 9-kii Sebteembar 2026 Aqalka Sare uu isna ansixiyey sharciga la xiriira la-dagaallanka burcad-badeedda iyo ka-hortagga afduubka.
Soomaaliya ayaa sheegtay in ansixinta labada Aqal ay qayb ka tahay dadaallada lagu casriyeynayo qaab-dhismeedka sharciyeed ee dalka, laguna xoojinayo sarreynta sharciga, ilaalinta nolosha dadka iyo sugidda amniga badaha.
Hase yeeshee, Dowladda ayaa carrabka ku adkeysay in sharci keliya uusan ku filnayn ciribtirka burcad-badeednimada, iyadoo loo baahan yahay dhaqan-gelin wax-ku-ool ah, xoojinta hay’adaha amniga iyo ilaalinta xeebaha, awoodda garsoorka iyo dacwad-oogista, iyo abuurista fursado dhaqaale oo wanaagsan oo ay helaan bulshada ku nool deegaannada xeebaha.
Sidoo kale, Soomaaliya waxay sheegtay inay muhiim tahay in la xoojiyo iskaashiga gobolka iyo beesha caalamka, iyadoo mas’uuliyadda koowaad ee amniga iyo maamulidda biyaha Soomaaliya ay saaran tahay dowladda Soomaaliya.
Dowladdu waxay burcad-badeednimada ku tilmaantay arrin ka baxsan amniga oo keliya, iyadoo ku xirtay dib-u-dhiska dowladnimada, ilaalinta madax-bannaanida iyo khayraadka badda, kobcinta dhaqaalaha iyo sugidda amniga ganacsiga caalamiga ah ee mara biyaha Soomaaliya.
Golaha Shacabka ayaa ugu dambeyn Xildhibaannada ugu baaqay in doodaha ku saabsan burcad-badeednimada lagu saleeyo xog iyo xalal wax-ku-ool ah oo lagu xoojinayo amniga badaha Soomaaliya.
