Wararka ka imaanaya Bariga Dhexe ayaa sheegaya in in ka badan 200 oo dhalinyaro Itoobiyaan ah lagu xukumay dil toogasho gudaha dalka Sacuudi Carabiya, arrin si weyn u walaac gelisay bulshada iyo mas’uuliyiinta gobolka Tigray.
Sida ay baahisay warbaahinta Addis Standard, dhalinyaradan ayaa la sheegay in intooda badan lagu eedeeyay dambiyo la xiriira tahriibinta daroogada iyo falal kale oo culus, kuwaas oo sharciga Sacuudiga uu si adag uga qaado ciqaab, oo ay ku jirto dil toogasho.
Xafiiska Arrimaha Dhalinyarada ee gobolka Tigray ayaa si kulul uga hadlay arrintan, iyagoo ugu baaqay dowladda Itoobiya inay si degdeg ah u farageliso xaaladda dhalinyaradan, isla markaana ay qaaddo tallaabooyin diblomaasiyadeed oo lagu badbaadin karo noloshooda.
Mas’uuliyiinta xafiiska ayaa sheegay in ay jiraan walaac ku aaddan habka ay u dhacayaan dacwadaha dhalinyaradan, iyagoo tilmaamay in qaar badan aysan helin qareenno difaacaya ama aysan si buuxda u fahmin nidaamka garsoorka ee Sacuudiga.
Dhanka kale, dowladda Sacuudi Carabiya ayaan weli si rasmi ah uga hadlin tirada saxda ah ee dadka la xukumay ama xaaladda dacwadahooda, hase yeeshee dalkaasi ayaa caan ku ah fulinta xukunnada dilka ee la xiriira dambiyada daroogada iyo falalka argagixisada.
Arrintan ayaa kusoo beegmeysa xilli ay sii kordhayaan cabashooyinka ku aaddan xaaladda muwaadiniinta Itoobiya ee ka shaqeeya ama ku sugan dalalka Khaliijka, gaar ahaan kuwa wajahaya dhibaatooyin sharci iyo xadgudubyo xuquuqda aadanaha ah.
Ugu dambeyn, hay’adaha xuquuqda aadanaha ayaa ku baaqaya in la joojiyo fulinta xukunnada dilka ah ee lagu riday dhalinyaradan, isla markaana la siiyo fursad cadaalad ah oo dib loogu eego kiisaskooda.
