Rubio oo albaabka ka xirtay Xasan Sheekh? Madaxweynaha oo Washington ka soo laabtay
Madaxweynaha Soomaaliya Xasan Sheekh Maxamuud ayaa maanta dib ugu soo laabtay magaalada Muqdisho, kaddib safar uu Mareykanka ugu aaday ka qeybgalka kalfadhiga 81-aad ee Golaha Guud ee Qaramada Midoobay iyo kulamo uu la yeeshay madax iyo mas’uuliyiin caalami ah.
Madaxweynaha ayaa khudbad ka jeediyay Golaha Guud ee Qaramada Midoobay, isagoo ka hadlay xaaladda Soomaaliya, amniga, dhismaha hay’adaha dowladda iyo geeddi-socodka doorashooyinka dalka. Waxa uu sidoo kale kulamo dhinac ah magaalada New York kula yeeshay madax ay ka mid yihiin Madaxweynaha Serbia, Madaxweynaha Senegal, Madaxweynaha Zimbabwe iyo Ra’iisul Wasaaraha Pakistan.
Si kastaba, safarka ayaa soo jiitay hadal-heyn siyaasadeed oo xooggan kadib markii aan la shaacin kulan rasmi ah oo Madaxweyne Xasan Sheekh uu magaalada Washington kula yeeshay Xoghayaha Arrimaha Dibadda Mareykanka Marco Rubio.
Warar soo baxay intii uu madaxweynuhu ku sugnaa Mareykanka ayaa sheegayay in Villa Somalia ay dadaal ugu jirtay sidii loo heli lahaa kulan heer sare ah oo uu Xasan Sheekh la yeesho mas’uuliyiin Mareykan ah, gaar ahaan Rubio, balse ilaa hadda ma jiro war rasmi ah oo xaqiijinaya kulan dhexmaray labada mas’uul.
Arrintan ayaa kusoo beegmeysa xilli Soomaaliya ay wajahayo xaalad siyaasadeed oo cakiran, iyadoo dowladda federaalka iyo dhinacyada mucaaradka ay weli isku mari la’yihiin qaabka loo wajahayo doorashooyinka iyo heshiiska siyaasadeed ee dalka.
Doodda ugu weyn waxay hadda ku saabsan tahay isbeddellada dastuurka, muddooyinka hay’adaha dowladda iyo qaabka loo qabanayo doorashada xigta. Warbixinno la xiriira khilaafka ayaa sheegaya in wada-hadalladii dowladda iyo kooxaha mucaaradka ay hore u istaageen, iyadoo labada dhinac ay weli ku kala aragti duwan yihiin qaabka doorashada loo maamulayo.
Dhanka kale, Madaxweyne Xasan Sheekh ayaa Qaramada Midoobay ka sheegay in Soomaaliya ay doonayso taageero caalami ah, balse ay muhiim tahay in hay’adaha Soomaaliyeed ay lahaadaan doorka hoggaamineed ee arrimaha dalka.
Soo laabashada madaxweynaha ee Muqdisho ayaa sidaas darteed kusoo beegmeysa xilli indhaha lagu hayo tallaabada xigta ee Villa Somalia iyo jawaabta mucaaradka, iyadoo aan weli la gaarin heshiis siyaasadeed oo labada dhinac ah.
Safarka Mareykanka iyo natiijadiisa, gaar ahaan xiriirka Washington iyo Muqdisho, ayaa sidoo kale la filayaa inuu sii ahaado arrin si weyn looga doodo maalmaha soo socda.
