Al-Shabaab oo jidka u galay ciidamada dowladda iyo wararkii ugu dambeeyay
Wararka hordhaca ah ayaa sheegaya in dagaalyahanno ka tirsan Al-Shabaab ay weerar gaadmo ah ku qaadeen ciidamo ka tirsan dowladda Soomaaliya oo ku safrayay waddada isku xirta Xarardheere iyo Ceelhuur ee gobolka Mudug.
Weerarka ayaa la sheegay inuu dhacay subaxnimadii Saaka xilli ciidamada dowladda ay marayeen deegaan miyi ah oo ka tirsan aagga u dhexeeya labada degmo.
Ilo deegaanka ah ayaa sheegay in dagaal qaraar uu dhexmaray ciidamada dowladda iyo maleeshiyaadka Al-Shabaab, balse lama xaqiijin tirada dadka ku dhintay ama ku dhaawacmay weerarka.
Faahfaahinta dhacdada ayaa weli kooban, iyadoo goobta uu dagaalku ka dhacay ay tahay meel fog oo ay adag tahay in si degdeg ah loo helo xog madax-bannaan oo ku saabsan khasaaraha iyo sida uu iska horimaadku u dhacay.
Weerarkan ayaa kusoo beegmaya xilli ay gobolka Mudug ka socdaan howlgallo iyo iska horimaadyo u dhexeeya ciidamada dowladda, kuwa deegaanka iyo Al-Shabaab.
Bishii Nofeembar 2025, ciidamada dowladda oo kaashanaya dagaalyahanno deegaanka ah ayaa dagaal kula galay Al-Shabaab deegaanka Dumaaye, oo ka tirsan degmada Xarardheere.
Waddada isku xirta Xarardheere iyo Ceelhuur ayaa sidoo kale horey u ahayd goob ay kooxaha hubeysan ka fuliyaan weerarro gaadmo ah.
