Puntland Oo Fashilisay Weerar Lagu Doonayay In Lagu Qabsado Garoonka Goldogob
Ciidamada amniga Puntland ayaa sheegay in ay fashiliyeen isku day lagu doonayay in lagu qabsado garoonka diyaaradaha ee degmada Goldogob ee gobolka Mudug, kadib xiisad kooban oo saaka ka dhacday halkaas.
Sida ay sheegeen masuuliyiinta amniga gobolka iyo degmada, kooxo hubeysan ayaa isku dayay in ay si xoog ah u galaan garoonka, balse waxaa ka hor istaagay ciidamada ku sugnaa goobta, kahor inta aysan gaarin hadafkooda.
Taliyaha Booliska degmada Goldogob, Laba Xiddigle Xuseen Cali Warsame, ayaa sheegay in kooxihii weerarka soo qaaday ay ku guuldareysteen in ay la wareegaan garoonka, isla markaana ciidamada amniga ay si degdeg ah u xakameeyeen xaaladda.
Masuuliyiinta amniga Puntland ayaa sidoo kale xaqiijiyay in garoonka uu hadda si buuxda gacanta ugu jiro ciidamada Puntland, ayna socoto xoojinta amniga gudaha iyo hareeraha degmada.
Dhanka kale, ilo amni iyo qaar kamid ah dadka deegaanka ayaa sheegay in ay arkeen dhaqdhaqaaqyo la xiriira ciidamada Dowladda Federaalka Soomaaliya oo ka socday qaybo ka mid ah Goldogob. Wararkaasi ayaa tilmaamaya in cutubyo federaal ah ay si kooban u galeen ama u gaareen agagaarka garoonka, hase yeeshee lama helin caddeyn madax-bannaan oo xaqiijinaysa arrintaas.
Puntland ayaa si adag u beenisay in ay jirto in lagala wareegay gacan ku heynta garoonka, waxayna ku adkaysatay in garoonku uu si buuxda uga tirsan yahay maamulkeeda.
Dhinaca kale, Dowladda Federaalka Soomaaliya weli kama aysan hadlin si faahfaahsan dhaqdhaqaaqyada lagu soo warramay ee ka dhacay Goldogob.
