Dowladda Masar ayaa sare u qaaday muhiimadda istaraatiijiyadeed ee Soomaaliya, iyadoo sheegtay in xasilloonida, midnimada iyo wadajirka Soomaaliya ay tiir muhiim u yihiin amniga Masar, Badda Cas, Geeska Afrika iyo guud ahaan nabadda gobolka.
Wasiirka Arrimaha Dibadda Masar, Badr Abdelatty, ayaa mowqifkan ka sheegay shirkii aan caadiga ahayn ee dalalka ciidamada ku biiriya Hawlgalka Midowga Afrika ee Taageerada iyo Xasillinta Soomaaliya (AUSSOM), kaas oo lagu qabtay magaalada Kampala ee Uganda.
Abdelatty ayaa mar kale xaqiijiyay in Qaahira ay si adag u taageersan tahay midnimada, madax-bannaanida iyo wadajirka dhuleed ee Soomaaliya, isla markaana ay kasoo horjeeddo tallaabo kasta ama heshiis kasta oo wax u dhimaya qarannimada Soomaaliya.
Masar oo diiradda saareysa dhaqdhaqaaqyada Israel iyo Itoobiya
Mowqifka Masar ayaa kusoo beegmaya xilli loollanka istaraatiijiyadeed ee Geeska Afrika iyo Badda Cas uu sii xoogeysanayo.
Falanqeeye Masaari ah, Emadeddin Hussein, ayaa sheegay in Soomaaliya ay noqotay meel ay quwado kala duwan ku loollamayaan dano istaraatiiji ah, isagoo tilmaamay in Masar ay si joogto ah uga hortimid isku-day kasta oo lagu kala qaybinayo Soomaaliya.
Warbixintu waxay si gaar ah farta ugu fiiqaysaa Itoobiya iyo Israel, iyadoo Qaahira ay walaac ka muujinayso tallaabooyin ay u aragto kuwo saameyn ku yeelan kara khariidadda siyaasadeed iyo amni ee Geeska Afrika iyo Badda Cas.
Abdelatty ayaa sidoo kale cambaareeyay tallaabada Somaliland ay xafiis diblomaasiyadeed uga furatay Bariga Qudus, isagoo ku celiyay taageerada Masar ee midnimada Soomaaliya.
Qaahira oo cadaadis ku saaraysa taageerada AUSSOM
Kulamadii ka dhacay Kampala ayaa sidoo kale xoogga lagu saaray mustaqbalka AUSSOM iyo Xafiiska Taageerada Qaramada Midoobay ee Soomaaliya (UNSOS).
Wasiirka Arrimaha Dibadda Masar ayaa beesha caalamka iyo xubnaha Golaha Ammaanka ee Qaramada Midoobay ugu baaqay inay xaqiijiyaan maalgelin joogto ah oo labada howlgal u saamaxaysa inay sii gutaan waajibaadkooda Soomaaliya.
Abdelatty ayaa arrintan kala hadlay masuuliyiin sare oo ka tirsan AUSSOM iyo Qaramada Midoobay, isagoo walaac ka muujiyay caqabadaha dhaqaale ee wajahaya howlgalka.
Dhanka kale, kulan uu la yeeshay Madaxweynaha Soomaaliya Xasan Sheekh Maxamuud, Abdelatty ayaa ku celiyay in Masar aysan aqbali doonin tallaabooyin wax u dhimaya madax-bannaanida iyo wadajirka dhuleed ee Soomaaliya.
Soomaaliya oo qayb ka noqotay loollanka Masar iyo Itoobiya
Dhaqdhaqaaqyada Qaahira ee Soomaaliya ayaa sidoo kale lala xiriirinayaa khilaafka muddada dheer kala dhexeeya Itoobiya, gaar ahaan muranka Biyo-xireenka GERD iyo loollanka marin-u-helidda Badda Cas.
Diblomaasi la hadlay warbaahinta ayaa ku dooday in istaraatiijiyadda Masar aysan hadda ku koobnayn oo keliya GERD, balse Qaahira ay xoojinayso xiriirkeeda Soomaaliya, Eritrea iyo Jabuuti, saddex dal oo muhiim u ah marin-biyoodka Badda Cas iyo marinada Itoobiya ee dhinaca badda.
Tallaabadan ayaa muujinaysa in Soomaaliya ay sii noqonayso xuddun muhiim ah oo ka tirsan tartanka juqraafi-siyaasadeed ee ka socda Geeska Afrika.
Masar ayaa hore u shaacisay inay ciidamo iyo taageero saadka ah ku biirinayso AUSSOM, taas oo sii xoojinaysa joogitaankeeda amni iyo militari ee Soomaaliya.
Farriinta kasoo baxaysa Qaahira ayaa hadda cad: midnimada iyo xasilloonida Soomaaliya ma aha oo keliya arrin Soomaaliyeed, balse Masar waxay u aragtaa qayb toos ah oo ka mid ah amnigeeda qaranka iyo loollanka istaraatiijiyadeed ee Badda Cas iyo Geeska Afrika.
