Wasaaradda Amniga ee Dowladda Koonfur Galbeed ayaa sheegtay in gebi ahaanba la soo afjaray kooxo ay ku tilmaantay “Khawaarij” oo maanta weerar ku qaaday magaalada Baydhabo.
War-saxaafadeed ay soo saartay Wasaaraddu ayay ku sheegtay in ciidamadu ay si adag uga hortageen weerarka, isla markaana ay dhammaad ku soo afjareen kooxihii weerarka soo qaaday.
Wasaaradda ayaa sidoo kale ammaan iyo mahadcelin u jeedisay Ciidamada Qalabka Sida, iyadoo ku bogaadisay naf-hurnimada iyo dadaalka ay muujiyeen intii uu socday dagaalka.
Si kastaba, faahfaahin madax-bannaan oo ku saabsan khasaaraha dhinacyada iyo xaaladda guud ee magaalada weli si buuxda looma xaqiijin.
Baydhabo ayaa maanta wajahday dagaal culus, iyadoo warar kala duwan oo ka soo baxay dhinacyada iska soo horjeeda ay isku khilaafeen cidda ka dambeysay weerarka iyo xaaladda dhabta ah ee goobta dagaalka.
Ciidamada madaxweynihii hore ee Koonfur Galbeed Cabdicasiis Laftagareen ayaa iyagu sheegay inay weerareen magaalada islamarkaana ay la wareegeen qeybo badan oo Kamid ah magaalada halka dowladda federaalka Soomaaliya ay iminka sheegeyso in lasoo afjaray weerar ay koox argagixiso ah kusoo qaaday magaalada Baydhabo.
