Muqdisho (Banaadir24) — Howlgalka Midowga Afrika ee Soomaaliya (AUSSOM) ayaa qorsheynaya inuu la wareego afar saldhig oo milatari oo ku yaalla gobolka Shabeellaha Hoose, kaddib markii Uganda ay bilowday qorshaha ay ciidamadeeda ugala baxayso Soomaaliya.
Wakaaladda wararka ee Associated Press (AP) ayaa sheegtay in saldhigyada la qorsheynayo in ciidamada AUSSOM ay la wareegaan ay kala yihiin Sabiid-Anole, Bariire, Awdheegle iyo Buulo-Nagaad, kuwaas oo muhiim u ah howlaha amniga iyo difaaca caasimadda Muqdisho.
Qorshahan ayaa qeyb ka ah dib-u-habeyn lagu sameynayo howlgalka Midowga Afrika, iyadoo ciidamo kale oo AUSSOM ka tirsan loo qorsheeyay in laga soo wareejiyo magaalada Baraawe si ay ula wareegaan afartaasi saldhig.
Warqad uu howlgalka AUSSOM u diray xafiiska taageerada Qaramada Midoobay ee Soomaaliya (UNSOS) 31-kii October ayaa lagu muujiyey muhiimadda ay saldhigyadani u leeyihiin sugidda amniga caasimadda iyo deegaanada ku xeeran.
Dhanka kale, dowladda Uganda ayaa bilowday la bixidda ciidamadeeda Soomaaliya ku joogay heshiiska laba geesoodka ah, iyadoo kooxdii ugu horreysay ay dib ugu laabteen dalkooda.
Afhayeenka ciidamada Uganda, Colonel Chris Magezi, ayaa sheegay in ciidamada ku jooga heshiiska labada dal ay dalka ka bixi doonaan maalmo gudahood, halka ciidamada kale ee Uganda ee qeybta ka ah howlgalka AUSSOM ay qorshuhu yahay inay si tartiib ah uga baxaan Soomaaliya dhammaadka sannadka 2027.
