Fadeexad:- Qeylo-dhaan kasoo yeertay Xujeyda Soomaaliyeed & lacago…
Qaar kamid ah Xujeyda Soomaaliyeed ee sanadkan gudanaya waajibaadka Xajka ayaa ka cabanaya dhibaatooyin nololeed oo ay sheegeen inay kasoo wajahday goobaha ay degan yihiin ee dalka Sacuudiga, xilli lacag badan laga qaaday kahor safarkooda.
Xujeydan oo qaarkood la hadlay warbaahinta ayaa sheegay inay wajahayaan xaalado adag oo dhinaca nolosha ah, kuwaasi oo ay kamid yihiin cunno yari, gaadiid la’aan iyo hoy ka fog goobaha cibaadada gaar ahaan Masjidka Xaramka.
Qaar kamid ah dadka cabashada muujinaya ayaa sheegay in goobaha la dejiyay ay aad uga fog yihiin Xaramka, taasoo ku qasabtay inay lug dheer ku tagaan goobaha cibaadada, iyadoo intooda badan ay yihiin dad waayeel ah oo aan awoodin socodka dheer.
Waxay sidoo kale sheegeen in haweenkii Soomaaliyeed ee cuntada u karin jiray ama ay ka iibsan jireen raashinka laga eryay goobihii ay deganaayeen, taasina ay keentay inay waayaan meel ay si fudud uga helaan cunto ku habboon.
“Lacag badan ayaa nala soo siiyay, balse maanta waxaan la dhibtoonaynaa cunno iyo gaadiid la’aan. Dad badan waa daalan yihiin, qaarna caafimaad ahaan ayay saameyn ku yeelatay,” ayuu yiri mid kamid ah xujeyda cabashada qabta.
Xujeyda ayaa sheegay inay sidoo kale waayeen gaadiid ay ku tagaan goobaha muhiimka ah ee cibaadada, taas oo sii kordhisay culayska heysta xilli cimiladu aad u kulushahay.
Waxay Dowladda Federaalka Soomaaliya, gaar ahaan Wasaaradda Awqaafta iyo Arrimaha Islaamka, ugu baaqeen inay si deg deg ah uga jawaabto cabashadooda islamarkaana wax ka qabato xaaladaha adag ee ay wajahayaan.
Ilaa hadda ma jiro wax war rasmi ah oo kasoo baxay dowladda Soomaaliya ama hay’adaha qaabilsan adeegyada xujeyda ee ku saabsan cabashooyinka kasoo yeeraya qaar kamid ah xujeyda Soomaaliyeed ee ku sugan Sacuudiga.
