Dowladda Federaalka oo dalalka Carabta iyo Mareykanka kala hadleysa qorshe lagu hor istaagayo aqoonsiga Somaliland
Wasiiru-dowlaha Wasaaradda Arrimaha Dibadda iyo Iskaashiga Caalamiga ah ee Soomaaliya, Cali Maxamed Cumar (Cali Balcad), ayaa sheegay in Soomaaliya ay dalalka Carabta ka codsatay inay adeegsadaan xiriirkooda iyo saameyntooda siyaasadeed si looga hortago in aqoonsiga Israa’iil siisay Somaliland uu isu beddelo olole aqoonsi oo ballaaran.
Cali Balcad, oo wareysi gaar ah siiyay wargeyska Asharq Al-Awsat, ayaa sheegay in Soomaaliya ay sidoo kale xiriir toos ah la leedahay maamulka Madaxweyne Donald Trump, si ay uga muujiso diidmadeeda ku aaddan aqoonsiga Israa’iil.
Wuxuu sheegay in Soomaaliya aysan u arkin aqoonsiga Israa’iil inuu yahay tallaabo astaan uun ah, isagoo xusay in tallaabo kasta oo dibadeed oo lagu doonayo in lagu beddelo midnimada dhuleed ee Soomaaliya ay yeelan karto saameyn siyaasadeed iyo xitaa amni.
Cali Balcad wuxuu sidoo kale sheegay in Soomaaliya ay si dhab ah uga walaacsan tahay isku day kasta oo waddan shisheeye uu ku doonayo inuu Soomaaliya gudaheeda kaga sameysto joogitaan ciidan ama sirdoon, iyadoo aan oggolaansho laga haysan dowladda federaalka.
Wuxuu ka digay in arrinta Somaliland ay khatar ku noqon karto Soomaaliya iyo guud ahaan gobolka.
Isagoo ka hadlayay mowqifka Carabta, Cali Balcad wuxuu sheegay in jawaabtii degdegga ahayd ee dalalka Carabta ay ahayd mid muhiim ah, maadaama ay caddeysay in go’aanka Israa’iil uusan waxba ka beddelin mowqifka caalamiga ah iyo kan gobolka ee ku aaddan midnimada dhuleed ee Soomaaliya.
Wuxuu si gaar ah u sheegay:
“Ujeeddadu ma aha oo keliya in cambaareyn la soo saaro, balse waa in laga hortago in hal aqoonsi oo hal dhinac ah uu isu beddelo olole ballaaran. Sidaas darteed, waxaan ka codsanaynaa saaxiibbadeenna Carabta inay si firfircoon u adeegsadaan xiriirkooda siyaasadeed iyo saameyntooda diblomaasiyadeed.”
Cali Balcad wuxuu ku dooday in midnimada Soomaaliya aysan ahayn arrin Soomaaliya oo keliya khuseysa, isaga oo sheegay in kala-daadashada dal Carbeed iyo Afrikaan ah ay abuuri karto tusaale saameyntiisu ka gudbi karto Soomaaliya.
Dhanka Mareykanka, wuxuu sheegay in Muqdisho ay si joogto ah wadahadallo ula yeelato Washington oo ku saabsan madax-bannaanida Soomaaliya, amniga iyo xiriirka istiraatiijiga ah, isagoo xusay in ay jiraan xubno ka tirsan Kongareeska Mareykanka oo doonaya in siyaasadda Washington wax laga beddelo.
Si kastaba, wuxuu kala saaray baaqyada siyaasadeed iyo saadaasha warbaahinta iyo siyaasadda rasmiga ah ee Mareykanka, isagoo sheegay in maamulka Trump uu si cad u taageerayo Soomaaliya oo mid ah, isla markaana Mareykanku weli aqoonsan yahay madax-bannaanida iyo midnimada dhuleed ee Jamhuuriyadda Federaalka Soomaaliya, oo ay ku jirto Somaliland.
Cali Balcad ayaa sidoo kale sheegay in xiriirka Soomaaliya iyo Itoobiya uu hadda ku saleysan yahay Bayaanka Ankara ee 2024, kaas oo labada dhinac ay ku xaqiijiyeen ixtiraamka madax-bannaanida, midnimada iyo dhul ahaanshaha midba midka kale.
Wuxuu sheegay in Itoobiya ay heli karto marin badeed iyadoo loo marayo heshiisyo ganacsi oo labada dhinacba faa’iido u leh, balse ay tahay inay ku dhacdo iyadoo la ilaalinayo awoodda iyo madax-bannaanida Jamhuuriyadda Federaalka Soomaaliya.
Ugu dambeyn, Cali Balcad wuxuu sheegay in Soomaaliya ay doonayso inay mustaqbalka ka gudubto dal ay beesha caalamku ku mashquulsan tahay xasilintiisa, una gudubto dal si firfircoon uga qayb qaata xasilloonida iyo amniga Badda Cas, Geeska Afrika iyo gobolka.
