Muqdisho (Banaadir24) — Warar laga helayo ilo xog-ogaal ah ayaa sheegaya in sarkaal hore uga tirsanaa Hay’adda Nabadsugidda iyo Sirdoonka Qaranka (NISA), kaas oo gaaray darajada Abaanduulaha Ururka Duufaan, uu ka baxay magaalada Muqdisho, kuna biiray kooxda Al-Shabaab.
Sarkaalka ayaa la sheegay in horay xilka looga qaaday kadib markii looga shakiyay arrimo la xiriira amniga, waxaana la sheegay inuu markii dambe si qarsoodi ah uga baxay magaalada Muqdisho.
Ilo xog-ogaal ah ayaa tilmaamaya in sarkaalkan uu ka baxay degmada Dayniile, kadibna la geeyay deegaanka Basra ee gobolka Shabeellaha Hoose, halkaas oo markii dambe looga sii gudbiyay gobolka Jubbada Dhexe, oo ay ka taliyaan Al-Shabaab.
Wararka ayaa intaas ku daraya in dhaqdhaqaaqii sarkaalkan uu ku dhammaaday deegaannada ay kooxda Al-Shabaab maamusho, taasoo dhalisay su’aalo ku saabsan sida uu uga baxay caasimadda iyo habraacyada amni ee lagu ilaalinayo saraakiisha hay’adaha sirdoonka.
Haddii xogtan la xaqiijiyo, waxay noqon kartaa arrin culus oo su’aalo ka dhalisa nidaamka ilaalinta xogaha sirdoonka iyo baaritaanka saraakiisha hore ee hay’adaha amniga.
