Dowladda Federaalka Soomaaliya ayaa ciidamo dheeraad ah u dirtay magaalada Baydhabo, si loo xoojiyo ammaanka Guddoomiyihii hore ee Golaha Shacabka, Sheekh Aadan Maxamed Nuur (Madoobe), iminkana ah madaxweynaha Koonfur Galbeed, xilli ay sii kordhayaan xiisadaha u dhexeeya dowladda Federaalka iyo ciidamada daacadda u ah madaxweynihii hore ee Koonfur Galbeed, Cabdicasiis Xasan Maxamed Laftagareen.
Sida ay sheegeen ilo deegaanka ah iyo kuwo dhinaca amniga ah, ciidamada cusub ayaa lagu daabulay Baydhabo, waxaana la sheegay in howlgalka ciidamadan uu diiradda saarayo ilaalinta Sheekh Aadan Madoobe, mas’uuliyiinta la safan maamulkiisa iyo xarumaha muhiimka ah ee dowladda.
Lama oga tirada rasmiga ah ee ciidamada la geeyay Baydhabo, iyadoo dowladda Federaalka aysan weli shaacin cutubyada ciidanka ee ka qeyb qaatay hawlgalka iyo muddada ay magaalada ku sugnaan doonaan.
Ciidamada Laftagareen oo iyaguna dhaq-dhaqaaqaya
Ciidamada dowladda Federaalka ayaa Baydhabo gaaray xilli la sheegay in ciidamo taabacsan Laftagareen ay kordhiyeen joogitaankooda gudaha magaalada iyo deegaanada ku hareeraysan.
Ilo deegaanka ah ayaa sheegay in dhaqdhaqaaqyo ciidan lagu arkayay waddooyinka muhiimka ah ee magaalada laga soo galo iyo kuwa laga baxo, inkastoo aan si madax-bannaan loo xaqiijin karin goobaha saxda ah ee ay ciidamadaasi fariisimaha ka dhigteen iyo ujeeddada dhaqdhaqaaqooda.
Ilaa hadda ma jiraan warar si madax-bannaan loo xaqiijiyay oo sheegaya in labada dhinac uu dhexmaray dagaal toos ah.
Si kastaba, dhaq-dhaqaaqyada milatari ayaa walaac weyn ku abuuray shacabka Baydhabo iyo mas’uuliyiinta taageersan maamulka uu hoggaamiyo Sheekh Aadan Madoobe. Qaar ka mid ah dadka deegaanka ayaa ka cabsi qaba in ciidamo dheeraad ah oo magaalada la geeyo ay xiisadda siyaasadeed u beddeli karaan iska horimaad hubeysan.
