Dhulgariir cabbirkiisu yahay 4.7 magnitude ayaa lagu soo warramay inuu ka dhacay dhulka badda ee waqooyiga Soomaaliya, gaar ahaan meel qiyaastii 159 kiiloomitir waqooyi ka xigta degmada Caluula ee gobolka Bari sida laga soo xigtay website-ka la socodka dhul-gariirada ee Earthquake tracker.
Dhacdadan ayaa la diiwaangeliyey 15-ka Sebtembar 2026 saacaddu markii ay ahayd 2.46 am saqdii dhexe saacadda Soomaaliya, iyadoo xogta hordhaca ah ay tilmaamayso in dhulgariirku ka dhacay qiyaastii 10 kiiloomitir dhulka hoostiisa.
Goobta uu dhulgariirku ka dhacay ayaa ku taalla meel ka baxsan xeebaha Soomaaliya, waxaana xogaha la helayo ay muujinayaan in gariirku uu ahaa mid si weyn loo dareemi karo haddii uu saameeyey deegaannada ku dhow halka uu ka dhacay.
Dhulgariirrada ka dhaca meelaha badda hoosteeda ah mararka qaar waxay sababi karaan gariir laga dareemo dhulka ku dhow, iyadoo heerka saameyntu uu ku xirnaan karo xoogga dhulgariirka, qoto-dheeraantiisa iyo masaafada ay deegaannadu u jiraan halka uu ka dhacay.
Ilaa hadda, ma jiraan warar la xaqiijiyey oo sheegaya dhimasho, dhaawac ama burbur hantiyeed oo ka dhashay dhulgariirkan. Hay’adaha la socda dhaqdhaqaaqa dhulka ayaa sii wadi doona qiimeynta dhacdada, waxaana suurtagal ah in xogta ku saabsan cabbirka ama goobta saxda ah ee dhulgariirka la cusboonaysiiyo.
