Dagaal culus oo u dhexeeyay ciidamada Midowga Afrika ee howlgalka AUSSOM, gaar ahaan kuwa ka socda Uganda, iyo dagaalyahanno ka tirsan Al-Shabaab ayaa ka dhacay deegaanka Mubaarak oo hoostaga degmada Owdheegle ee gobolka Shabeellaha Hoose.
Wararka laga helayo goobta ayaa sheegaya in dagaalka uu qarxay kadib markii xubno ka tirsan Al-Shabaab ay weerar ku qaadeen saldhig ay ciidamada AUSSOM ku leeyihiin deegaanka Mubaarak. Weerarka ayaa la sheegay inuu ku bilowday qaraxyo iyo rasaas xooggan oo si lama filaan ah loogu qaaday saldhigga, taasoo keentay in ciidamada Uganda ay si degdeg ah uga jawaabaan weerarkaasi.
Goobjoogayaal ku sugan deegaanka ayaa sheegay in labada dhinac ay isweydaarsadeen hub culus iyo mid fudud muddo saacado ah, iyadoo la maqlayay jugta madaafiicda iyo rasaasta culus oo si weyn looga dareemay deegaanada ku dhow Mubaarak. Dagaalka ayaa sidoo kale sababay cabsi xooggan oo soo wajahday dadka rayidka ah ee ku nool halkaasi, kuwaas oo qaarkood bilaabay inay ka barakacaan guryahooda.
Ilo amni ayaa tilmaamaya in ciidamada AUSSOM ay ku guuleysteen inay iska caabiyaan weerarka, isla markaana ay dib u riixaan dagaalyahannadii Al-Shabaab ee soo qaaday weerarka. Si kastaba ha ahaatee, weli si rasmi ah looma shaacin khasaaraha rasmiga ah ee ka dhashay dagaalka, inkastoo warar hordhac ah ay sheegayaan inuu jiro khasaare dhimasho iyo dhaawac isugu jira oo soo kala gaaray labada dhinac.
Degaanka Mubaarak iyo guud ahaan degmada Owdheegle ayaa marar badan noqday goob ay ku soo noqnoqdaan dagaallo u dhexeeya ciidamada dowladda iyo kuwa AUSSOM oo dhinac ah iyo Al-Shabaab, maadaama ay kooxdaasi weli ku leedahay dhaqdhaqaaqyo ciidan oo xooggan deegaanno ka tirsan gobolka Shabeellaha Hoose.
Dhanka kale, saraakiil ka tirsan howlgalka AUSSOM iyo dowladda Federaalka Soomaaliya ayaan weli si rasmi ah uga hadlin weerarkaasi iyo khasaaraha ka dhashay, hase yeeshee waxaa la filayaa in saacadaha soo socda ay faahfaahin dheeraad ah ka bixiyaan.
