Cumar Cabdirashiid Oo Digniin Culus Ka Soo Saaray Xiisadda Gaalkacyo
Ra’iisul Wasaarihii hore ee Soomaaliya, Cumar Cabdirashiid Cali Sharmaarke, ayaa ka digay in xiisadda militari ee sii kordheysa magaalada Gaalkacyo ay isu beddeli karto qalalaase amni oo saameyn ballaaran ku yeesha Puntland iyo guud ahaan Soomaaliya.
Qoraal uu soo saaray, Cumar Cabdirashiid ayaa ugu baaqay madaxda siyaasadda, isimada dhaqanka iyo culimada inay qaadaan dadaallo degdeg ah oo lagu dejinayo xaaladda, isagoo ku adkeystay in khilaafka lagu xalliyo wada hadal iyo hannaan sharci, halkii loo adeegsan lahaa awood ciidan.
Wuxuu sheegay in Gaalkacyo aysan noqon meel uu ka qarxo dagaal cusub, isagoo ka digay in isku dhac dhex mara dhinacyo ka soo jeeda hal deegaan uu wiiqi karo dadaallada lagula dagaallamayo Al-Shabaab, isla markaana uu leexin karo ciidamada iyo agabka muhiimka u ah sugidda amniga dalka.
Ra’iisul Wasaarihii hore ayaa sidoo kale xusay in dagaal ka dhaca Gaalkacyo uu sababi karo xasillooni darro baahsan, dhibaato bani’aadannimo iyo in dhinacyo kale ay ku lug yeeshaan colaadda, isagoo ku baaqay in laga hortago xaalad kasta oo horseedi karta iska horimaad hubeysan.
