Ciidamada Itoobiya oo Guud ahaan Amniga Baydhabo la wareegay walwal soo wajahay Shacabka
Magaalada Baydhabo ee xarunta gobolka Baay ayaa caawa wajahaysa xaalad amni oo aad u kacsan, kaddib markii la sheegay in ciidamada Itoobiya ay si buuxda ula wareegeen afarta jiho ee magaalada.
Wararka la helayo ayaa tilmaamaya in ciidamadan la siiyay amar adag oo ku saabsan xakameynta dhaqdhaqaaqa, iyadoo aan la oggolaan doonin wax gelitaan ama bixitaan ah wixii ka dambeeya 5:00 galabnimo. Tallaabadan ayaa si weyn u saameysay isku socodka dadka iyo gaadiidka, iyadoo magaalada laga dareemayo cabsi iyo hubanti la’aan.
Ilaa hadda, saraakiisha ciidamada Itoobiya kama aysan bixin wax faahfaahin rasmi ah oo ku saabsan sababta ay u qaadeen tallaabadan adag. Si kastaba ha ahaatee, wararka hordhaca ah ayaa muujinaya in ciidamadaasi ay si dhow ula safteen maamulka Koonfur Galbeed ee uu hoggaamiyo Madaxweyne Cabdicasiis Laftaagareen.
Dhanka kale, waxaa la sheegay in inta badan ciidamada Koonfur Galbeed la geeyay duleedka magaalada Baydhabo, halkaas oo ay uga hortagayaan weerarro ay suurtagal tahay in ay ka yimaadaan ciidamada dowladda federaalka iyo kuwa mucaaradka ah.
Sidoo kale, degmada Buurhakaba ayaa lagu soo waramayaa in ay ku sugan yihiin ciidamo tiro badan oo isugu jira kuwa dowladda iyo maleeshiyaad ay la socdaan wasiirro ka tirsan dowladda, kuwaas oo la sheegay inay wadaan qorshe ka dhan ah maamulka Koonfur Galbeed. Si kastaba ha ahaatee, xaaladda halkaasi ayaa weli ah mid cakiran, iyadoo ay adag tahay in si dhab ah loo saadaaliyo halka ay ku dambeyn doonto.
Guud ahaan, xiisaddan cusub ayaa sare u qaaday walaaca laga qabo amniga gobolka, iyadoo shacabka ku nool Baydhabo ay wajahayaan xaalad adag oo u baahan xal degdeg ah iyo degenaansho.
