Sannad iyo bar ka hor waxaa la idiin diray Kismaayo iyada oo la sheegay in Madaxweyne Axmed Madoobe heshiis uga baxay Madaxweyne Xasan Sheekh. Waxaa la idinku dhextuuray furin dagaal oo uu dhexaysa Al-shabaab, ciidammo shisheeye iyo walaallihiin Soomaaliyeed.
Muddo ka dib, siyaasiyiintii way isgacmo qaadeen, booshaqooyin ayaa la is dhaafsaday, Xasan wuxuu ka degay Kismaayo, Axmedna wuxuu yimi Muqdisho. Xiisaddii way degtay, laakiin, khasaarihii, dhaawacii iyo dhimashadii idinka ayaa qaaday. Miyaad maqasheen cid magdhow la siiyey, ama ciidankii soo jabay lagula xisaabtamay oo loo ciqaabay ama xil looga qaaday! Wuxuu noqday dagaal laga macaashay oo cidi ku hodontay. Haddaba, ha noqonina xaabo la shito, oo lagu dan gaaro.
Maanta isla taariikhdii ayaa soo noqotay. Markan waa Baydhabo iyo Koonfur Galbeed, iyada oo sidii hore oo kale uu Xasan Sheekh ku andacoonayo in Laftagareen heshiis uga baxay. Mar kale ayaa la adinku dhextuurayaa Al-shabaab, ciidan shisheeye iyo walaalihiin.
Siyaasaddu waa la isku khilaafaa, waana laga heshiiyaa, laakiin dagaalku waa mid reebaya raad joogto ah. Dhiig-daatay iyo naf baxday midna lama soo celin karo. Ma aha in la idiin adeegsado dagaallo siyaasadeed oo berri miiska wadahadalka lagu dhammayn doono.
Ciidanka qaranka waajibkiinnu waa 1) Difaaca dalka; 2) ilaalinta amniga shacabka; iyo 3) la-dagaallanka argagixisada.
Dagaalka maanta Baydhabo lagu qaadayo ma aha baahi qaran, ee waa damac siyaasadeed iyo dan nin keli ahi wato. Noloshiinnu ma aha wax raqiis lagu bixiyo, mustaqbalkiinnu ma aha wax lagu gorgortamo, dhiiggiinuna ma aha wax dano siyaasadeed loo qubo. Iska diida amar kasta oo sharcidarro ah. Ha gelinina dagaal aad og tihiin in uu khalad yahay, kana hor imanaya damiirkiina iyo masuuliyadda dalkiinna.
Ugu danbayntii dhiig Soomaaliyeed ha u daadinina siyaasad berri laga heshiin doono, oo gacanqaad, booqasho iyo miis wadahadal ku dhammaan doonta. Aayihiina wax aan faa’iido idiinku jirin ha u waayinina.
W/Q: Cabd
