Burcad-badeed Soomaali ah ayaa sii daayay markab ay bishii April ka qafaasheen xeebaha Soomaaliya, iyadoo la sii daayay 17-ka shaqaale ee markabka saarnaa, sida ay ilo amni oo Puntland ah u sheegeen AFP.
Markabka MV Sward ayaa la afduubtay 26-kii April, waxaana burcaddu markii dambe u adeegsanayeen sidii markab ay kaga hawlgalaan xeebaha Soomaaliya iyo Gacanka Cadmeed. Shaqaalaha markabka ayaa isugu jiray 15 Suuriyaan ah iyo laba Hindi ah.
Ilo amni ayaa sheegay in markabka lagu sii daayay agagaarka Garacad, halka burcaddu ay markabka ka degeen kadib markii la bixiyay lacag madax-furasho ah. Lacagta la bixiyay lama shaacin. Ilo kale ayaa sheegay in gaadiid sugayay burcaddu ay ka qaadeen xeebta, taas oo muujin karta in shabakado dhulka ku sugan ay xiriir la lahaayeen kooxaha badda.
Warkan ayaa kusoo beegmaya xilli burcad-badeednimada Soomaaliya ay si weyn dib ugu soo xoogeysatay. Warbixinno cusub ayaa sheegaya in tan iyo April ay dhaceen ugu yaraan siddeed afduub, halka xogta IMO ay tilmaamayso in Soomaaliya iyo Gacanka Cadmeed ay sanadkan heleen ugu yaraan 15 weerar oo burcad-badeednimo ah, taas oo ah heerkii ugu sarreeyay tan iyo 2013.
Waxaa sidoo kale hore loo sii daayay markabka MV Lutuf, balse dowladda Soomaaliya waxay sheegtay in ciidamo Soomaali iyo Turki ah ay ku soo furteen howlgal socday 10 maalmood, halka Puntland ay ku doodday in madax-furasho la bixiyay. Labada dhinac weli waxay leeyihiin warar iska soo horjeeda oo ku saabsan sida markabkaas loo sii daayay.
