Burcad-badeed Soomaali ah oo markale qabsaday markab shidaal
Markab yar oo sida shidaal iyo kiimikooyin oo lagu magacaabo Asana ayaa la sheegay in ay la wareegeen kooxo hubeysan xilli uu marayay Gacanka Cadmeed, waxaana ilo amni oo dhinaca badaha ah ay tuhunsan yihiin in weerarka ay ka dambeeyeen burcad-badeed Soomaali ah.
Hay’adda UK Maritime Trade Operations (UKMTO) ayaa sheegtay in markabka ay fuuleen dad aan loo oggolayn meel qiyaastii 65 mayl-badeed koonfur kaga beegan dekedda Al-Mukalla ee dalka Yemen. Shirkado amniga badda la socda ayaa sheegay in qiimeyntii ugu horreysay ay muujineyso in dhacdadan ay la xiriirto burcad-badeed Soomaaliyeed, halkii ay ka ahaan lahayd weerar ay geysteen Xuutiyiinta Yemen.
Xogta raadraaca maraakiibta ayaa muujisay in Asana uu qorsheynayay inuu ku soo xirto dekedda Boosaaso ka hor inta uusan weerarku dhicin. Sida ay sheegeen ilo amni, markab dagaal oo Kuuriyada Koonfureed leedahay ayaa u dhaqaaqay goobta kaddib markii markabku diray fariin gurmad ah.
Dhacdadan ayaa kusoo beegmaysa xilli ay sii kordhayaan weerarrada burcad-badeedda ee Gacanka Cadmeed iyo Badweynta Hindiya, taasoo dib u soo nooleysay walaac laga qabay amniga marin-biyoodka caalamiga ah kaddib sannado ay yaraadeen afduubyada maraakiibta.
