Baydhabo oo qarka u saaran isbeddel amni oo weyn kadib warar laga helayo ciidamada Itoobiya
Warar ay baahinayaan qaar ka mid ah warbaahinta gudaha Itoobiya ayaa sheegaya in ciidamada Itoobiya ay bilaabeen inay ka baxaan xarumaha ugu muhiimsan ee magaalada Baydhabo, oo ay ka mid yihiin Xarunta Madaxtooyada Koonfur Galbeed, Garoonka Diyaaradaha iyo goobo kale oo muddo dheer ay amnigooda sugayeen.
Wararkan ayaa kusoo beegmaya xilli ay sii kordhayaan xiisadaha amni ee Baydhabo, iyadoo warar kala duwan ay sheegayaan in ciidamada Daraawiishta ee taabacsan madaxweynihii hore ee Koonfur Galbeed, Cabdicasiis Laftagareen, ay ku sugan yihiin duleedka magaalada.
Haddii wararkan uu noqdaan kuwo sax ah, waxaa ka dhalan kara saameyn ballaaran oo dhinaca amniga iyo siyaasadda ah. Waxaa suuragal ah in:
1 – Ciidamada Dowladda Federaalka iyo kuwa Koonfur Galbeed lagu qasbo inay si degdeg ah ula wareegaan ammaanka xarumaha muhiimka ah.
2 – In sare ay u kacaan cabsi laga qabo isku dhacyo cusub oo ka dhaca gudaha Baydhabo haddii dhinacyada isku haya magaalada ay isku dayaan inay buuxiyaan meelaha ay ciidamada Itoobiya ka baxaan.
3 – In xaaladda siyaasadeed ee Koonfur Galbeed ay gasho marxalad cusub oo xasaasi ah, maadaama Baydhabo ay tahay xarunta maamulka gobolka.
4 – Khatar amni oo cusub inay soo wajahdo garoonka diyaaradaha iyo xarumaha dowladda haddii aan si degdeg ah loo buuxin farqiga amni ee ka dhasha bixitaanka ciidamada.
