Al-Shabaab oo Weerar Gaadmo ah ku Qaadday Kolonyo Ciidan oo Kenyaan ah
Maleeshiyaadka Al-Shabaab ayaa habeenkii Isniinta weerar gaadmo ah ku qaaday kolonyo ay la socdeen ciidamada ammaanka Kenya, kuwaas oo marayay duleedka magaalada Dadaab ee gobolka Garissa, sida ay xaqiijiyeen ilo amni.
Wararka hordhaca ah ayaa sheegaya in kooxda ay bartilmaameedsatay gaadiidka ciidamada xilli ay marayeen waddo ku taalla bannaanka Dadaab. Ilaa iyo hadda, dowladda Kenya si rasmi ah uma shaacin khasaaraha ka dhashay weerarka ama baaxadda waxyeellada.
Weerarkan ayaa kusoo beegmaya iyadoo ciidamada Kenya ay sii wadaan hawlgallo amni oo ballaaran oo ka socda waqooyi-bari dalka, kuwaas oo looga gol leeyahay in lagu xakameeyo dhaqdhaqaaqyada Al-Shabaab iyo ka hortagga weerarrada ka gudba xadka Soomaaliya iyo Kenya.
Gobolka Garissa, gaar ahaan deegaanka Dadaab, ayaa muddo dheer ahaa goob ay ka dhacaan weerarro isdaba joog ah oo ay Al-Shabaab fuliyaan, kuwaas oo isugu jira qaraxyo miinooyinka waddooyinka lagu aaso, weerarro gaadmo ah iyo weerarro lagu beegsado ciidamada ammaanka iyo shacabka.
Garissa, Mandera iyo Lamu ayaa weli ka mid ah gobollada Kenya ee ugu nugul weerarrada Al-Shabaab, maadaama ay ku dhow yihiin xadka Soomaaliya. Kooxdu waxay marar badan isku dayday inay carqaladeyso hawlgallada amniga ee Kenya isla markaana cabsi ku abuurto bulshada ku nool deegaannada xuduudda.
Mid ka mid ah weerarradii ugu dhimashada badnaa ee Al-Shabaab ka fulisay gudaha Kenya wuxuu ahaa weerarkii Jaamacadda Garissa sanadkii 2015, kaas oo lagu dilay 148 qof, halka tobannaan kalena lagu dhaawacay. Weerarkaas ayaa sababay in Kenya ay si weyn u xoojiso tallaabooyinka la dagaallanka argagixisada iyo amniga gobollada waqooyi-bari.
