Al-Shabaab oo ku howlan helista hub casri ah & Mareykanka oo digniin soo saaray
Xiriir sii xoogeysanaya oo u dhexeeya Al-Shabaab iyo Xuutiyiinta Yemen ayaa isu beddelaya khatar cusub oo amni oo saameyn ku yeelan karta Soomaaliya, Gacanka Cadmeed iyo danaha Mareykanka iyo xulafadiisa.
Warbixin uu daabacay wargeyska The Wall Street Journal ayaa sheegtay in labada dhinac ay iska kaashanayaan hub, tababar iyo farsamooyin militari, iyadoo Al-Shabaab ay raadineyso hub casri ah, halka Xuutiyiintuna ay doonayaan inay ballaariyaan saameyntooda iyo awoodda ay uga hawlgalaan meel ka baxsan Yemen.
Sida warbixintu sheegtay, xiriirka waxaa fududeeyay Jibril, Yahya Ali, oo Soomaali ah, kaas oo lagu tilmaamay inuu dhex-dhexaadinayay labada kooxood tan iyo ugu yaraan 2023. Waxaa sidoo kale la sheegay in hub laga soo raro Yemen, kadibna lagu soo gudbiyo Gacanka Cadmeed iyadoo loo adeegsanayo doonyo xawaare sare leh ama maraakiib kalluumeysi.
Warbixintu waxay intaas ku dartay in xubno ka tirsan Al-Shabaab loo diray Yemen si ay u helaan tababar la xiriira drones iyo walxaha qarxa, halka kooxda ay gudaha Soomaaliya ka heshay hub iyo qalab casri ah.
Mareykanka ayaa arrintan u arka khatar ka weyn tan Soomaaliya oo keliya. Taliyaha ciidamada Mareykanka ee Afrika, Gen. Dagvin Anderson, ayaa sheegay in Al-Shabaab ay heli karto hub iyo tababar horumarsan, halka Xuutiyiintuna ay heli karaan meel ay kusii ballaariyaan saameyntooda.
Gacanka Cadmeed ayaa arrintan ka dhigaya mid xasaasi ah, maadaama uu yahay marin muhiim u ah ganacsiga iyo shidaalka caalamka. Iskaashiga labada kooxood ayaa sidaas darteed kor u qaadi kara khatarta maraakiibta ganacsiga iyo ciidamada shisheeye ee ku sugan gobolka.
Mareykanka ayaa durba qaaday tallaabooyin uu ku doonayo inuu ku carqaladeeyo shabakaddan, iyadoo warbixintu sheegtay in Jibril lagu dilay duqeyn Mareykanku fuliyay oo ka dhacday Yemen bishii Febraayo.
Si kastaba, warbixintu waxay muujineysaa in xiriirka Al-Shabaab iyo Xuutiyiinta uusan ahayn oo keliya iskaashi ku kooban Yemen iyo Soomaaliya, balse uu yeelan karo saameyn ballaaran oo ku saabsan amniga Badda Cas, Gacanka Cadmeed iyo maraakiibta caalamiga ah.
