Dagaalyahannada Al-Shabaab ayaa xalay saqdii dhexe weerar hoobiyeyaal ah ku qaaday fariisimo ay Ciidanka Dowladda Federaalka Soomaaliya ku leeyihiin degmada Xarardheere ee gobolka Mudug, sida ay sheegeen dadka deegaanka.
Goobjoogayaal ayaa sheegay in dhowr madfac ay ku dhaceen agagaarka fariisimaha ciidamada, iyadoo jugta qaraxyada laga maqlayay qaybo badan oo ka tirsan magaalada xeebta ah. Weerarka ayaa socday daqiiqado ka hor inta aanu istaagin.
Ilaa hadda ma jiro war rasmi ah oo ka soo baxay dowladda Soomaaliya oo xaqiijinaya khasaaraha ka dhashay weerarka, waxaana sidoo kale aan la ogeyn in ay jiraan dhimasho, dhaawac ama burbur hantiyeed.
Dadka deegaanka ayaa sheegay in madaafiicdu ay ku dhacaysay goobaha ay ciidamada dowladda ku sugan yihiin gudaha iyo hareeraha degmada Xarardheere, inkastoo aan si madax-bannaan loo xaqiijin karin saameynta dhabta ah ee weerarka.
Wararka hordhaca ah ayaa tilmaamaya in ciidamada dowladda ay weli ku sugan yihiin fariisimahooda kadib weerarka, hase yeeshee lama shaacin wax hawlgal jawaab ah oo la xiriira duqeyntaasi.
Weerarkan ayaa imanaya xilli ciidamada dowladda iyo kuwa deegaanka ay toddobaadyadii la soo dhaafay kordhiyeen howlgallada ka dhanka ah Al-Shabaab ee gobollada dhexe ee dalka, inkastoo kooxda ay sii waddo weerarada gaadmada ah iyo duqeymaha aan tooska ahayn ee ay ku beegsaneyso saldhigyada ciidamada dowladda.
