Muqdisho (Banaadir24) — Hoggaamiyaha Dowlad Goboleedka Koonfur Galbeed, Sheekh Aadan Maxamed Nuur (Aadan Madoobe), ayaa sheegay in kooxda Al-Shabaab ay u soo bandhigtay heshiis, balse uu si cad u diiday, isaga oo ku adkeystay in dagaalka lagula jiro kooxda uusan jirin waddo kale oo lagu soo afjari karo.
Aadan Madoobe ayaa sheegay in uusan diyaar u ahayn heshiis uu la galo Al-Shabaab, isaga oo tilmaamay in nabad lagu raadsado tanaasul noocaas ah aysan ahayn nabad dhab ah.
Hoggaamiyaha Koonfur Galbeed ayaa hadalkiisa ku muujiyay mowqif adag oo ku aaddan dagaalka ka dhanka ah kooxda, isaga oo sheegay in dagaal mooyee aysan jirin nabad dhexmari karta labada dhinac.
Dhanka kale, Aadan Madoobe ayaa weerar afka ah ku qaaday maamulkii hore ee Koonfur Galbeed, isaga oo ku eedeeyay in uu xiriir iyo heshiis la lahaa Al-Shabaab, eedeymahaas oo uu ku sheegay hadalkiisa.
Hadalka Aadan Madoobe ayaa imaanaya xilli Koonfur Galbeed ay ka jiraan xiisado siyaasadeed iyo kuwo amni, kuwaas oo ay barbar socdaan khilaafka kala dhexeeya siyaasiyiintii iyo hoggaankii hore ee maamulka.
Mowqifka uu hoggaamiyuhu shaaciyay ayaa mar kale soo bandhigaya sida uu u arko dagaalka Al-Shabaab, iyadoo hadalladiisa ku saabsan maamulkii hore ay sidoo kale dhalin karaan dood siyaasadeed oo cusub.
Banaadir24 Online
