Dowladda Turkiga ayaa lagu wadaa in ay maalmaha soo socda Soomaaliya u soo dirto saraakiil ciidan oo qubaro ah, kuwaas oo kaalin muhiim ah ka qaadan doona arrimo la xiriira amniga iyo tayeynta Ciidanka Xoogga Dalka Soomaaliyeed.
Warar lagu kalsoonaan karo ayaa tilmaamaya in qubaradan ay si gaar ah uga shaqeyn doonaan dhismaha, dib-u-habaynta iyo tababarka ciidamada qaranka, si loo xoojiyo awoodda difaac ee dalka iyo la-dagaallanka kooxaha khatarta ku ah amniga Soomaaliya.
Saraakiishan ka imaanaya Turkiga ayaa la filayaa in ay:
Kor u qaadaan tayada tababarka ciidanka.
La shaqeeyaan hoggaanka militariga Soomaaliyeed.
Ka qeyb qaataan hirgelinta qorshayaal cusub oo amni iyo difaac.
Sidoo kale, qubaradu waxay door muhiim ah ka ciyaari doonaan:
Sugidda amniga goobaha shidaalka laga qodayo.
Ilaalinta xarumo muhiim ah oo ay ka mid tahay xarunta dayax-gacmeedka ee Soomaaliya.
Mashruucyadan ayaa ah kuwo istaraatiiji ah oo laf-dhabar u noqon kara horumarka dhaqaale iyo tiknoolajiyadeed ee dalka mustaqbalka.
Arrintan ayaa imanaysa iyadoo dhawaan dowladda Turkiga ay Muqdisho keentay diyaarado dagaal oo nooca F-16, taas oo muujinaysa xiriir iskaashi oo sii xoogeysanaya oo u dhexeeya Turkiga iyo Soomaaliya, gaar ahaan dhinacyada amniga, difaaca iyo la-dagaallanka argagixisada.
Tallaabadan ayaa lagu tilmaamay mid sare u qaadaysa awoodda difaac ee Soomaaliya isla markaana xoojinaysa doorka Turkiga ee taageerada amni ee Geeska Afrika.
