Soomaaliya oo Wajahaysa Marxalad Halis ah, Warbixin Cusub oo Digniin Culus Soo Saartay
Warbixin cusub ayaa ka digtay in Soomaaliya ay wajahdo marxalad amni oo aad u xasaasi ah, iyadoo la sheegay in mustaqbalka howlgalka Midowga Afrika ee AUSSOM iyo taageerada uu ka helo Qaramada Midoobay ay noqdeen arrimo si weyn walaac u abuuraya.
Warbixintu waxay tilmaantay in haddii aan xal degdeg ah laga gaarin maalgelinta iyo taageerada howlgalka, ay jiri karto khatar ah in uu yimaado firaaq amni, taas oo dib u dhigi karta guulihii laga gaaray la dagaallanka Al-Shabaab iyo dadaallada lagu xasilinayo dalka.
Sidoo kale, warbixintu waxay xustay in khilaafaadka siyaasadeed ee u dhexeeya Dowladda Federaalka iyo qaar ka mid ah dowlad-goboleedyada, iyo dib u dhaca ku yimid qorshaha kala guurka amniga, ay sii kordhinayaan hubanti la’aanta ku xeeran xaaladda dalka.
Warbixintu waxay ugu baaqday Dowladda Federaalka Soomaaliya, Midowga Afrika, Qaramada Midoobay iyo saaxiibbada caalamiga ah inay si degdeg ah u gaaraan heshiis lagu xaqiijinayo maalgelinta iyo sii socoshada howlgalka AUSSOM, si looga hortago xaalad amni oo sii xumaata dhammaadka sanadkan.
