Dhalinyaro ka tirsan Wasaaradda Horumarinta Khayraadka Biyaha Somaliland oo dhawaan tababar shaqo ugu baxay dalka Israa’iil ayaa weli ku sugan halkaas, xilli ay dalkaasi ka dhacayaan weerarro dhinaca cirka ah oo kordhiyay walaaca laga qabo xaaladda amni.
Dhalinyaradan oo loo diray tababar la xiriira horumarinta iyo maareynta khayraadka biyaha ayaa la sheegay inay barnaamij aqoon-kororsi ah ka qaadanayaan xarumo ku yaalla gudaha Israa’iil. Tababarkan ayaa qayb ka ah dadaallada lagu xoojinayo aqoonta iyo khibradda shaqaalaha ka shaqeeya arrimaha biyaha ee Somaliland.
Si kastaba ha ahaatee, maalmihii la soo dhaafay qoysaska dhalinyaradan ayaa muujiyay walaac ku saabsan badbaadadooda, kaddib markii ay soo baxeen warar sheegaya in dalka Iiraan uu duqeymo dhinaca cirka ah la beegsanayay gudaha Israa’iil, taas oo sii kordhisay xiisadda ka taagan gobolka.
Ehellada qaar ayaa sheegay inay si joogto ah ula xiriiraan dhalinyaradooda si ay uga ogaadaan xaaladdooda, balse ay weli ka qabaan cabsi ku aaddan amniga guud ee halka ay ku sugan yihiin.
Dhanka kale, mas’uuliyiin ka tirsan Wasaaradda Horumarinta Khayraadka Biyaha Somaliland ayaa hore u sheegay in tababarkani muhiim u yahay kobcinta xirfadaha shaqaalaha, isla markaana uu gacan ka geysan doono horumarinta adeegyada biyaha ee Somaliland.
Ilaa iyo hadda ma jiro war rasmi ah oo kasoo baxay dowladda Somaliland oo ku saabsan xaaladda dhalinyaradaasi ama tallaabooyin gaar ah oo la xiriira ammaankooda, inkastoo qoysaskoodu ay rajeynayaan in xaaladdooda si dhow loola socdo.
