Muqdisho (Banaadir24) — Wasiiru-Dowlaha Wasaaradda Arrimaha Dibadda iyo Iskaashiga Caalamiga ah ee Soomaaliya, Cali Maxamed Cumar (Cali Balcad), ayaa maanta xafiiskiisa ku qaabilay wafdi ka socda Hawlgalka Kaalmada Qaramada Midoobay ee Soomaaliya (UNTMIS), kaas oo uu hoggaaminayay Ku-simaha Madaxa Hawlgalka, Raisedon Zenenga.
Kulanka ayaa diiradda lagu saaray wejiga ugu dambeeya ee geeddi-socodka kala-guurka UNTMIS, xaaladaha siyaasadeed iyo amni ee dalka, iyo sidii xil-wareejinta hawlgalka ay u xoojin lahayd awoodda hay’adaha dowladda Soomaaliya.
Labada dhinac ayaa sidoo kale ka hadlay muhiimadda ay leedahay ilaalinta guulaha laga gaaray nabad-dhiska iyo dowlad-dhiska, xilli Soomaaliya ay ku jirto marxalad muhiim ah oo ku aaddan la wareegidda mas’uuliyadaha hawlgalka.
Wasiiru-Dowlaha Cali Balcad ayaa mar kale adkeeyay sida ay Dowladda Federaalka Soomaaliya uga go’an tahay in geeddi-socodka kala-guurka UNTMIS uu noqdo mid ay Soomaaliya hoggaamiso, isla markaana ay hay’adaha dalka si buuxda ula wareegaan mas’uuliyadaha loo igmaday.
Ugu dambeyn, Wasiiru-Dowluhu wuxuu Qaramada Midoobay uga mahadceliyay iskaashiga muddada dheer ee ay la lahayd Soomaaliya, isaga oo muujiyay muhiimadda ay leedahay in wada-shaqeynta labada dhinac ay gacan ka geysato xoojinta nabadda, amniga iyo dowladnimada dalka.
