Baydhabo (Banaadir24) — Dagaal culus ayaa la soo sheegay inuu saaka ka qarxay degmada Buurhakaba ee gobolka Bay, kaas oo u dhexeeya ciidamada Daraawiishta Koonfur Galbeed ee daacadda u ah Cabdicasiis Xasan Maxamed Laftagareen iyo ciidamo la safan Dowladda Federaalka Soomaaliya.
Dagaalka ayaa kusoo beegmaya xilli ay sii xoogeysanayaan xiisadaha la xiriira gacan ku haynta degmada Buurhakaba, oo ah deegaan muhiim u ah xaaladda amni iyo siyaasadeed ee Koonfur Galbeed.
Wasiirka Warfaafinta ee maamulka Laftagareen, Ugaas Xasan, ayaa qoraal uu ku baahiyay boggiisa Facebook ku xaqiijiyay in ciidamada Daraawiishta Koonfur Galbeed ay degmada ka bilaabeen howlgal uu ku tilmaamay mid lagu xaqiijinayo amniga.
“Saaka waxaa degmada Buurhakaba ka bilowday howlgal amni oo ay fulinayaan ciidamada geesiyaasha ah ee Daraawiishta Dowladda Koonfur Galbeed,” ayuu yiri wasiirku.
Sidoo kale, wuxuu shacabka degmada ugu baaqay inay guryahooda ku sugnaadaan inta uu howlgalka socdo, taas oo muujinaysa walaaca laga qabo xaaladda amni ee deegaanka.
Ilaa hadda, faahfaahin rasmi ah lagama helin khasaaraha ka dhashay dagaalka, tirada ciidamada ku lugta leh ama dhinaca gacanta ku haya goobaha muhiimka ah ee degmada.
Xaaladda Buurhakaba ayaa si dhow isha loogu hayaa, iyadoo isku dhacyadan ay sii kordhin karaan xiisadaha u dhexeeya maamulka Koonfur Galbeed iyo Dowladda Federaalka Soomaaliya.
Banaadir24 — Wararka Soomaaliya iyo xogaha ugu dambeeya.
