Guddoomiyaha Golaha Wakiilada ee Puntland, Abdirisak Ahmed Said, ayaa si kulul u cambaareeyey falal uu ku tilmaamay caburin iyo khatar-gelin ay ku kacday Dowladda Somalia, kuwaas oo lagu bartilmaameedsaday xildhibaanno iyo shacab musaafiriin ah oo ku sii jeeday deegaannadooda.
Eedeymaha Guddoomiyaha
Guddoomiyuhu wuxuu sheegay in xildhibaannada lagu hor istaagay gelitaanka xarunta Baarlamaanka, isla markaana maanta laga hor istaagay inay dib ugu laabtaan deegaannadooda iyagoo sooman.
Wuxuu ku tilmaamay tallaabooyinkan kuwo is-daba-joog ah oo muujinaya xigmad-yari iyo burbur ku yimid hay’adihii federaalka.
“Falalkan waxay khatar ku yihiin nidaamka dowladnimo iyo wadajirka ummadda Soomaaliyeed,” ayuu yiri Guddoomiyuhu.
Guddoomiyuhu wuxuu si toos ah farta ugu fiiqay Madaxweynaha Hassan Sheikh Mohamud, isaga oo ku eedeeyey inuu doonayo samaynta dastuur u gaar ah iyo sii-joogitaan awood ku dhisan rabitaan shaqsiyeed, halkii laga ilaalin lahaa dastuurkii lagu heshiiyey sanadkii 2012.
Wuxuu xusay in tallaabooyinkaasi aysan waafaqsaneyn anshaxa dowladnimo iyo dhaqanka Soomaaliyeed.
Difaaca Dastuurka iyo Midnimada
Guddoomiyaha ayaa adkeeyey in shacabka Soomaaliyeed, gaar ahaan reer Puntland shacab iyo dowladba aysan aqbali doonin wax ka baxsan dastuurkii lagu heshiiyey 2012, isla markaana aysan oggolaan doonin in xukun lagu sii joogo si khasab ah ama ummadda la kala fogeeyo.
Wuxuu tacsi iyo tiiraanyo u diray shacabka Soomaaliyeed, isaga oo sheegay inay nasiib darro tahay in dhibaato noocaas ah lagu sameeyo iyada oo magaca dowladnimo la adeegsanayo.
