Puntland oo hanjabaad culus u dirtay ciidamada Dowladda Federaalka ka qoratay deegaanadeeda
Maamulka Puntland ayaa si kulul uga hadlay ciidamada ay Dowladda Federaalka Soomaaliya ka qoratay deegaanno ka tirsan Puntland, isagoo uga digay inay ka fogaadaan tallaabo kasta oo wax u dhimi karta ammaanka iyo xasilloonida maamulka.
Taliyaha Qaybta Booliska Gobolka Mudug ee Puntland, Gaashaanle Sare Maxamuud Muuse Bile (Farda-fuul), oo la hadlayay cutubyo ka tirsan ciidamada Puntland, ayaa farriin adag u diray ciidamada ku biiray Dowladda Federaalka, isagoo ugu baaqay inay garab istaagaan bulshada iyo deegaannadooda.
“Dadka xaabada ah ee lagu shaqaystay ee muuqaalada laga duubtay oo sharaftooda lagu ciyaaray waxaan leenahay isdaba qabta. Puntland adiga ah dhulkaagii weeye, difaaceeda iyo quruxdeedana adigaa leh,” ayuu yiri Gaashaanle Sare Maxamuud Muuse Bile (Farda-fuul).
Taliyaha ayaa sidoo kale eedeyn u jeediyay madaxda Dowladda Federaalka Soomaaliya, isagoo ku dooday in ay wadaan qorsheyaal lagu qalqalgelinayo amniga Puntland, isla markaana ay deegaannada maamulka ka qoranayaan ciidamo uu ku tilmaamay kuwo aan si rasmi ah loo aqoon.
Hadalka kasoo baxay mas’uulkan ayaa kusoo beegmaya xilli ay isa soo tarayaan hadallada is khilaafsan ee u dhexeeya Dowladda Federaalka iyo Puntland, kuwaas oo la xiriira arrimaha amniga, maamulka iyo habka loo maamulayo ciidamada.
