Madaxweynaha Jabuuti, Ismaaciil Cumar Geelle, ayaa maqaal uu dhawaan ku qoray Jeune Afrique si cad uga hadlay arrimaha ku saabsan aqoonsiga ay Israa’iil siisay Somaliland, isagoo ku tilmaamay tallaabadaas mid khatar ku ah xasilloonida gobolka iyo midnimada Soomaaliya.
Geelle ayaa sheegay in ujeedada Israa’iil ay tahay in ay ka faa’iideysato dhulka Somaliland iyadoo wadata ujeedo aan nabad ahayn, wuxuuna tilmaamay in maamulka Somaliland uu diyaar u yahay in uu wax walba siiyo Netanyahu si uu u helo aqoonsigaas. Sidoo kale, madaxweynuhu wuxuu ka digay saldhig milatari oo ay Israa’iil ka samaysatay Berbera, isagoo sheegay in taasi ay tahay arrinta ugu weyn ee laga baqayo.
Madaxweynaha Jabuuti ayaa sidoo kale cambaareeyay doorka Imaaraadka Carabta, isagoo ku eedeeyay inay hormuud ka yihiin taageerada Israa’iil ee gobolka, islamarkaana ay abuuraan khilaafaad ka jira Yemen, Suudaan, Soomaaliya, Chad, Libya iyo meelo kale.
Geelle ayaa sidoo kale ka hadlay xiriirka Jabuuti iyo Somaliland, gaar ahaan Cabdiraxmaan Cirro, madaxweynaha Somaliland, isagoo sheegay:
“Xiriirku waa qabowyahay. Jabuuti ayaa diiday in ay la kulanto ama telefoon ka qabato Cabdiraxman Cirro. Xadka weli wuu furan yahay, balse duulimaadyadii hawada ee u dhexeeyay Jabuuti iyo Hargeysa waa la hakiyay.”
Madaxweynaha Jabuuti ayaa ku adkeystay in falsafada hoggaamiyeyaasha Somaliland muddo 34 sano ah lagu soo koobayo hal war: “Haba yaraatee agoonsi aan helno, xitaa haddii ay tahay mid shaydaan,” isagoo caddeeyay in Jabuuti aysan raacsaneyn in gobolka iyo Soomaaliya laga abuuro dhibaato siyaasadeed.
