ICG Oo Digniin Culus Ka Soo Saartay Al-Shabaab Iyo Bixitaanka AUSSOM
Hay’adda International Crisis Group (ICG) ayaa soo saartay digniin cusub oo ku saabsan mustaqbalka amniga Soomaaliya, iyadoo sheegtay in kala-guurka AUSSOM iyo hoos u dhaca taageerada caalamiga ah ay abuuri karaan firaaq amni oo Al-Shabaab ka faa’iideysan karto.
ICG ayaa sheegtay in haddii bixitaanka ciidamada AUSSOM aan si taxaddar leh loo qorsheyn, Al-Shabaab ay cadaadis dheeraad ah saari karto magaalooyin, waddooyin muhiim ah iyo xarumo dhaqaale oo ku yaalla koonfurta iyo bartamaha Soomaaliya.
Qoryoley Iyo Jalalaqsi Oo La Tilmaamay
Warbixinta ayaa si gaar ah u xustay Qoryoley ee gobolka Shabeellaha Hoose, iyadoo lagu tilmaamay meel nugul haddii ciidamada AUSSOM ay ka baxaan iyada oo aan la helin ciidan beddel ah iyo taageero saadka oo ku filan.
Sidoo kale, Jalalaqsi iyo waddooyinka muhiimka ah ee Hirshabelle ayaa ka mid ah meelaha ay ICG sheegtay inay wajihi karaan cadaadis dheeraad ah, gaar ahaan haddii ciidamada Soomaaliyeed aysan si buuxda ugu diyaar garoobin la wareegidda goobaha ay ciidamada Midowga Afrika ka baxayaan.
Si kastaba, ICG ma aysan saadaalin in dowladda Soomaaliya ay burburi doonto ama Al-Shabaab ay si degdeg ah ula wareegi doonto magaalooyinka waaweyn.
Digniinta hay’addu waxay ku saabsan tahay khatarta ka dhalan karta kala-guur aan si wanaagsan loo qorsheyn, taas oo wiiqi karta awoodda dowladda ee ilaalinta dhulka ay hadda maamusho.
Ciidamada Soomaaliya Oo Weli U Baahan Taageero Dibadeed
ICG waxay sheegtay in ciidamada Soomaaliya ay horumar sameeyeen, iyadoo in ka badan 10,000 askari lagu tababaray barnaamijyo ay taageerayaan Türkiye, Imaaraadka Carabta iyo Eritrea.
Hase yeeshee, tirada ciidamada oo keliya kuma filna in si buuxda loogu beddelo AUSSOM, maadaama ciidamada Soomaaliyeed ay weli ku tiirsan yihiin taageero dibadeed oo ay ka mid yihiin sirdoonka, taageerada cirka, gaadiidka iyo saadka.
Warbixintu waxay sidoo kale xustay in Uganda, Kenya iyo Itoobiya ay qayb ka noqon karaan qaabka cusub ee amniga Soomaaliya, halka Türkiga ay sii waddo tababarka ciidamada Soomaaliyeed, Mareykankuna uu qorsheynayo inuu sii wado howlgallada ka dhanka ah Al-Shabaab.
ICG Oo Muqdisho Ka Dalbatay Qorshe Cusub
ICG waxay ugu baaqday Dowladda Federaalka Soomaaliya inay dhisto gole amni oo joogto ah oo ay ku mideysan yihiin dowladda dhexe, dowlad-goboleedyada, dalalka ciidamada ka jooga Soomaaliya, saaxiibada amniga iyo deeq-bixiyeyaasha.
Golahaasi waa inuu dejiyo qorshe cad oo ku saabsan cidda ilaalinaysa magaalooyinka iyo waddooyinka muhiimka ah, sida loo bixinayo gaadiidka iyo gurmadka caafimaad, iyo halka ay ciidamada Soomaaliyeed kala wareegayaan ciidamada shisheeye.
ICG waxay sidoo kale ku talisay in laga fogaado howlgallo militari oo waaweyn ilaa la helo qorshe cad oo lagu maareynayo bixitaanka AUSSOM iyo beddelka ciidamadeeda.
2027 Oo Noqonaya Sannad Muhiim Ah
ICG waxay tilmaantay in qeybta dambe ee 2027 ay noqon karto xilli muhiim u ah amniga Soomaaliya, iyadoo dalka uu u baahan doono nidaam cusub oo amni oo shaqeynaya xilli UNSOS ay ku jirto marxaladda xiritaanka.
Warbixintu waxay ugu dambeyn tilmaantay in taageerada dalalka shisheeye ay noqon karto xal ku-meel-gaar ah, balse Soomaaliya ay u baahan tahay ciidan qaran oo awood u leh inuu si joogto ah u ilaaliyo magaalooyinka, waddooyinka iyo xarumaha muhiimka ah ee dalka.
