Ciidamada gurmadka degdegga ah, shaqaalaha ambalaasta iyo booliiska ayaa weli ku sugnaa goobta uu ka dhacay dab sababay dhimashada shan qof oo ka tirsan qoys Soomaaliyeed.
Dadka geeriyooday ayaa ahaa waalidiin da’doodu u dhaxaysay 30 illaa 40 sano jir iyo saddex carruur ah oo kala ahaa saddex, lix iyo siddeed sano jir. Ilmo yar oo maalmo keliya jiray ayaa ka badbaaday masiibada, inkastoo uu soo gaaray dhaawac halis ah, waxaana loola cararay isbitaal si loogu daweeyo.
Booliiska ayaa sheegay in shanta qof laga helay jaranjarada dhismaha, kadib markii ay ka soo baxeen gurigooda oo ku yaallay dabaqa saddexaad, xilli uu qiiq xooggan buuxiyay dhismaha.
“Tiradda qiiqa soo baxaysay aad bay u badnayd, jaranjaraduna ma ahayn mid suuragelin karta in laga gudbo,” ayuu yiri Mikael Backlund, oo ka tirsan Booliiska Bariga Uusimaa, shir jaraa’id uu qabtay.
Booliiska ayaa xaqiijiyay in aanay jirin wax calaamado ah oo muujinaya rabshad dibadeed oo loo geystay dhibbanayaasha.
Dabka ayaa u muuqda inuu ka bilowday guri ku yaalla dabaqa labaad, halkaas oo burburka ugu weyn laga arkay. Dhinaca dambe ee dhismaha oo ka kooban lix dabaq ayaa noqday mid madoobaaday, halka daaqadaha dabaqyada sare la jebiyay intii ay socdeen howlaha gurmadka.
Booliiska ayaa xiray nin 70-meeyo jir ah oo isla dhismaha deganaa. Sarkaalka baarista hoggaaminaya, Sanna Rentola, ayaa sheegtay in tuhmanuhu yahay nin u dhashay Finland oo aan lahayn taariikh dambiyo culus.
“Dambiyada lagu tuhunsan yahay waa dab ula kac ah oo culus iyo dil,” ayay tiri Rentola.
Waxay intaas ku dartay in aan qoyska Soomaaliyeed si gaar ah loo beegsan.
“Qoyska lama bartilmaameedsan si ka duwan qof kasta oo kale oo ku noolaa dhismaha,” ayay u sheegtay warbaahinta.
Rentola ayaa sidoo kale sheegtay in tuhmanuhu isagu isku soo dhiibay booliiska goobta, isla markaana lala hadlay, balse aan wali si rasmi ah wareysi loo qaadin.
Booliiska ma shaacin qaabka dabka loo shiday, hase yeeshee baaritaan farsamo ayaa muujinaya in dabka si ula kac ah loo huriyay.
Maamulka ayaa meesha ka saaray in falka uu ku salaysnaa naceyb ku dhisan midab-takoor.
“Ma jiraan wax muujinaya sabab cunsuriyadeed,” ayay tiri Rentola.
Afar qof oo kale ayaa ku dhaawacmay dabka, mid ka mid ahna xaaladdiisa ayaa weli ah mid halis ah, halka saddex kale ay qabaan dhaawacyo fudud, sida ay sheegeen booliisku
