Dowladda Xasan Sheekh oo lagu eedeeyay inay xubno Al-Shabaab ah ku dhex dartay hay’adaha dowladda
Warbixin cusub ayaa su’aalo culus ka keentay istaraatiijiyadda Madaxweyne Xasan Sheekh Maxamuud ee la dagaallanka Al-Shabaab, iyadoo lagu eedeeyay in xubno hore ama xiriir la lahaa kooxda lagu dhex daray qaar ka mid ah hay’adaha amniga iyo socdaalka Soomaaliya.
Warbixintu waxay sheegaysaa in maamulka Madaxweyne Xasan Sheekh Maxamuud uu adeegsanayo habab ay ka mid yihiin soo-dhoweyn, xog-uruurin iyo isdhexgal si loo wiiqo awoodda Al-Shabaab, taasoo dhalisay walaac ku saabsan khataraha ka iman kara in dad hore ula xiriiray kooxda lagu daro hay’adaha dowladda.
Arrintan ayaa kusoo beegmeysa xilli dowladda Madaxweyne Xasan Sheekh ay weli wajaheyso dagaal adag oo ay kula jirto Al-Shabaab, iyadoo kooxda ay sii waddo weerarradeeda iyo awooddeeda ay ku leedahay qeybo ka mid ah dalka.
Dhanka kale, warbixintu waxay tilmaamaysaa in khilaafaadka siyaasadeed ee ka jira Muqdisho ay sidoo kale wiiqayaan iskaashiga dowladda Xasan Sheekh ay la leedahay qaar ka mid ah saaxiibadeeda reer Galbeedka.
Habka uu maamulka Xasan Sheekh u wajahayo xubnaha hore ee Al-Shabaab ayaa noqon karta istaraatiijiyad amni oo faa’iido iyo khatarba leh. Xogo muhiim ah ayaa laga heli karaa xubnaha kooxda ka soo baxay, balse waxaa sidoo kale ka dhalan kara walaac ku saabsan amniga iyo kalsoonida hay’adaha dowladda.
