Dowladda Federaalka ah ee Soomaaliya ayaa shaacisay in si rasmi ah uu uga bilowday gobolka Shabeellaha Hoose howlgal amni oo ballaaran, kaas oo loogu magac daray “Howlgalka Hillaac”, laguna beegsanayo maleeshiyaadka Al-Shabaab.
Warsaxaafadeed ka soo baxay Wasaaradda Gaashaandhigga Soomaaliya ayaa lagu sheegay in howlgalka ay si wadajir ah u fulinayaan Ciidamada Xoogga Dalka Soomaaliyeed (CXDS), Ciidamada Uganda ee qeybta ka ah howlgalka Midowga Afrika ee AUSSOM, iyo saaxiibada caalamiga ah ee taageera Soomaaliya.
Sida lagu caddeeyay warsaxaafadeedka, howlgalka Hillaac waxaa lagu bartilmaameedsanayaa saldhigyada iyo goobaha ay ku dhuumaaleysanayaan dagaalyahannada Al-Shabaab, gaar ahaan meelaha ay ka abaabulaan weerarrada iyo falalka amni-darrada ah.
Wasaaradda Gaashaandhigga ayaa xustay in howlgalka uu qeyb ka yahay dadaallada joogtada ah ee lagu wiiqayo awoodda Al-Shabaab, isla markaana lagu soo celinayo xasiloonida iyo dowladnimada deegaannada ay saameeyeen colaadaha.
Wasaaradda Gaashaandhigga ayaa ku boorrisay shacabka ku nool Shabeellaha Hoose inay la shaqeeyaan ciidamada ammaanka, isla markaana ka fogaadaan goobaha ay howlgalladu ka socdaan si loo ilaaliyo badqabka rayidka.
Ugu dambeyn, Dowladda Federaalka ayaa caddeysay in Howlgalka Hillaac uu sii socon doono ilaa laga cirib-tiro Al-Shabaab, lana xaqiijiyo si nabad waarta iyo amni buuxa uu uga hanaqaada gobolka Shabeellaha Hoose iyo guud ahaan dalka.
