Dowladda Soomaaliya oo Ciidamo xoogan geysay Shabeellaha Dhexe kadib markii Al-Shabaab…
Dowladda Federaalka Soomaaliya ayaa billowday dhaqdhaqaaq ciidan oo cusub oo ka socda deegaanno ka tirsan HirShabeelle, iyadoo ciidamo dheeraad ah iyo saraakiil militari loo diray furimaha Shabeellaha Dhexe iyo Hiiraan.
Dhaqdhaqaaqan ayaa qeyb ka ah dadaallada dib loogu abaabulayo ciidamada dowladda iyo kuwa deegaanka, xilli Al-Shabaab ay toddobaadyadii u dambeeyay cadaadis militari ka wadday qeybo ka mid ah bartamaha Soomaaliya.
Wararka laga helayo Shabeellaha Dhexe ayaa sheegaya in ciidamo iyo saraakiil ka tirsan Ciidanka Xoogga Dalka ay gaareen degmada Raage Ceelle, halkaas oo laga bilaabay abaabul iyo isku dubbarid ciidan.
Qorshaha socda ayaa xoogga saaraya diyaarinta ciidamo awood u leh inay dhaqaaqaan marka la furo howlgallada cusub, iyadoo sidoo kale la doonayo in ciidamada dowladda ay taageero ka helaan dadka deegaanka.
Raage Ceelle iyo deegaannada ku dhow ayaa muhiimad gaar ah u leh amniga Shabeellaha Dhexe, waxaana deegaanka hore uga jiray abaabul ay sameeyeen dadka deegaanka oo taageerayay dagaalka ka dhanka ah Al-Shabaab.
Hiiraan oo isna dhaq-dhaqaaq laga dareemayo
Dhanka kale, gobolka Hiiraan ayaa isna wajahaya xaalad militari oo xasaasi ah, gaar ahaan kadib markii Al-Shabaab ay horaantii bishan dib ula wareegtay deegaanka Teedaan.
Teedaan ayaa muddo dheer loo arkayay goob muhiim u ah difaaca deegaannada ku teedsan degmada Maxaas. Al-Shabaab ayaa deegaanka la wareegtay kadib weerar iyo dagaal culus oo sababay in ciidamada dowladda iyo kuwa deegaanka ay dib uga baxaan.
Luminta Teedaan waxay sare u qaaday walaaca laga qabo in kooxda ay isku daydo inay cadaadis dheeraad ah saarto deegaannada kale ee Hiiraan, taas oo dowladda ku riixaysa inay dib u habeyso joogitaankeeda ciidan ee gobolka.
Ciidamada loo daabulayo HirShabeelle ayaa sidaas kusoo aadaya xilli dowladda ay u baahan tahay inay isku mar difaacdo goobaha ay hadda gacanta ku hayso, isla markaana dib u furto howlgallo lagu doonayo in lagu soo celiyo deegaannada laga baxay.
