Dowladda Federaalka oo Saanad Ciidan oo Tiro Badan u Daabushay Gobollo Istaraatiiji ah
Dowladda Federaalka Soomaaliya ayaa toddobaadyadii la soo dhaafay la sheegay inay xaddi badan oo rasaas iyo saanad ciidan ah ka daadgureysay bakhaarada milatariga, iyadoo loo kala diray gobollo kala duwan oo dalka ah, sida ay sheegeen ilo amni.
Wararka ayaa tilmaamaya in lix duullimaad oo saanad militari sida la fuliyay lixdii maalmood ee u dambeysay, kuwaas oo gaarsiiyay rasaas iyo qalab ciidan deegaanno ay ka mid yihiin Laascaanood, Baydhabo, Balad Xaawo, Jowhar iyo Dhuusamareeb.
Ilo xog-ogaal ah ayaa sheegay in saanadda la geeyay meelo ay ka socdaan howlgallo amni iyo deegaanno kale oo ay ka jiraan xiisado iyo khilaafaadyo maxalli ah, halka qaar kamid ah goobaha la gaarsiiyay ay yihiin kuwo amni ahaan deggan.
Ilaa hadda Dowladda Federaalka Soomaaliya si rasmi ah ugama hadlin ujeeddada ka dambeysa wareejinta saanaddan militari ama qorshaha hawlgal ee la xiriira.
Dhaqdhaqaaqan ayaa kusoo beegmaya xilli ay dalka ka socdaan dadaallo amni iyo howlgallo ka dhan ah kooxaha hubeysan, iyadoo sidoo kale gobollo qaar ay ka jiraan xaalado siyaasadeed iyo kuwo amni oo isbeddelaya.
Dowladda federaalka ayaa dadaal ballaaran ugu jirta sidii ay gacanta ugu dhigi lahayd guud ahaan dalka islamarkaana u xasilin lahayd ammaanka guud ee dalka.
