Muqdisho (Banaadir24) — Wargeyska The EastAfrican ayaa soo saaray faallo tifaftireed uu kaga hadlay qorshaha ciidamada Uganda ay uga baxayaan Soomaaliya, isagoo ka digay in bixitaanka ciidamadaasi uu abuuri karo fursad cusub oo ay Al-Shabaab dib ugu qabsato deegaanno iyo saldhigyo istiraatiiji ah oo ay horay uga baxeen.
Faallada ayaa lagu sheegay in ciidamada Uganda oo Soomaaliya ku sugnaa ku dhowaad labaatan sano ay door muhiim ah ka qaateen dagaalka lagula jiro Al-Shabaab iyo taageeridda ciidamada dowladda Soomaaliya.
Wargeysku wuxuu walaac ka muujiyey awoodda ciidamada Soomaaliya ee la wareegidda saldhigyada iyo goobaha muhiimka ah ee ay banneynayaan ciidamada shisheeye, isagoo xusay in haddii aan si wanaagsan loo qorsheyn wareejinta amniga ay dhici karto in Al-Shabaab ay dib ugu soo laabato deegaanno laga saaray.
Waxaa sidoo kale la tilmaamay in ciidamada Soomaaliya ay u baahan yihiin hub iyo gaadiid dagaal, dhaqaale joogto ah, sirdoon awood leh iyo taageero farsamo si ay u sugaan deegaannada laga xoreeyo Al-Shabaab.
Arrin kale oo walaac laga muujiyey ayaa ah khilaafaadka siyaasadeed ee u dhexeeya dowladda federaalka iyo dowlad-goboleedyada, kuwaas oo sida faallada lagu sheegay caqabad ku noqon kara dagaalka ka dhanka ah Al-Shabaab.
The EastAfrican ayaa sidoo kale ka digay in hoos u dhaca taageerada dhaqaale iyo saadka ee beesha caalamka uu sii adkeyn karo xaaladda amni ee Soomaaliya, isla markaana uu abuuri karo daldalool ay Al-Shabaab ka faa’iideysan karto.
Faallada ayaa ugu dambeyn ku baaqday in dowladda Soomaaliya, dowlad-goboleedyada iyo saaxiibada caalamiga ah ay isku duubni ka muujiyaan qorshaha amniga, si bixitaanka ciidamada Uganda uusan u horseedin dib u dhac ku yimaada guulihii laga gaaray dagaalka Al-Shabaab.
Bixitaanka ciidamada Uganda ayaa kusoo beegmaya xilli Soomaaliya ay wajahayso marxalad xasaasi ah oo ku saabsan la wareegidda mas’uuliyadda amniga dalka.
