Ciidamada Itoobiya oo si raami ah uga baxay Buurhakaba
Ciidamada Itoobiya ee qeybta ka ah howlgalka Midowga Afrika ee AUSSOM ayaa lagu soo warramayaa inay si rasmi ah uga baxeen magaalada istaraatiijiga ah ee Buurhakaba ee gobolka Baay, kaddib muddo ka badan 12 sano oo ay qeyb weyn ka ahaayeen sugidda amniga degmada.
Ciidamada Itoobiya ayaa Buurhakaba ku sugnaa tan iyo sanadkii 2014, markaas oo ay la wareegeen masuuliyadda amniga magaalada. Bixitaankooda ayaa hadda masuuliyadda amni ee degmada si weyn ugu wareejinaya ciidamada Soomaaliyeed iyo maamulka Koonfur Galbeed.
Xogaha la helayo ayaa sidoo kale tilmaamaya in Buurhakaba aysan ahayn magaalada keliya ee ciidamada AUSSOM ay qorsheynayaan inay baneeyaan. Ugu yaraan saddex magaalo oo waaweyn ayaa la sheegay inay qeyb ka yihiin qorshaha dhimista joogitaanka ciidamada howlgalka toddobaadyada soo socda.
Haddii qorshahan uu u hirgalo sida la sheegay, Dowladda Federaalka Soomaaliya ayaa wajihi karta masuuliyad amni oo sii kordheysa, xilli ciidamada Soomaaliyeed laga doonayo inay la wareegaan fariisimo iyo deegaanno muddo dheer ay gacanta ku hayeen ciidamada Midowga Afrika.
Arrintan ayaa sidoo kale kusoo aadaysa iyadoo Dowladda Federaalka ay dooneyso in dib loo dhigo bixitaanka ciidamada AUSSOM, si geeddi-socodka kala-guurka amniga loogu kordhiyo waqti dheeraad ah. Hase yeeshee, dhaqaale-yarida iyo muranka ku saabsan maalgelinta howlgalka ayaa kamid ah caqabadaha waaweyn ee hortaagan sii joogitaanka ciidamada.
Xafiiska Taageerada Qaramada Midoobay ee Soomaaliya (UNSOS) ayaa la sheegay inuu qeyb ka ahaa hannaanka wareejinta ee la xiriira bixitaanka ciidamada.
Bixitaanka Buurhakaba ayaa indhaha kusoo jeedinaya su’aasha ugu weyn ee xilligan taagan: ciidamada Soomaaliyeed ma awoodi doonaan inay si buuxda u buuxiyaan goobaha ay banneynayaan ciidamada AUSSOM, gaar ahaan deegaannada ay Al-Shabaab weli dhaqdhaqaaqyada ka waddo?
Waxaa la sugayaa faahfaahin rasmi ah oo dheeraad ah oo ku saabsan magaalooyinka kale ee qorshuhu yahay in ciidamada AUSSOM ay ka baxaan iyo jadwalka rasmiga ah ee wareejinta amniga.
