Cabdiraxmaan Cabdishakuur oo shaaciyay inuu ka naxay khudbadihii Xasan Sheekh iyo Xamsa
Siyaasiga mucaaradka ah Cabdiraxmaan Cabdishakuur Warsame ayaa si adag u dhaliilay khudbadihii ay munaasabadda Xorriyadda iyo Midnimada Soomaaliya ka jeediyeen Madaxweyne Xasan Sheekh Maxamuud iyo Ra’iisul Wasaare Xamse Cabdi Barre, isagoo ku tilmaamay kuwo ka leexday ujeeddadii maalinta qaran.
Qoraal uu soo dhigay bartiisa Facebook, Cabdiraxmaan Cabdishakuur wuxuu sheegay inuu aad uga naxay khudbadaha labada mas’uul, isagoo xusay in munaasabadda 1-da Luulyo ay ahayd in diiradda lagu saaro midnimada ummadda, xoojinta himilooyinka qaranka, iyo xuska halyeeyadii u soo halgamay xorriyadda iyo midnimada Soomaaliya, halkii laga gelin lahaa loollan siyaasadeed iyo weerarro lagu beegsanayo dadka dhaliila dowladda.
Siyaasigu wuxuu sidoo kale sheegay in maalintaasi ay mudnayd in dhammaan shacabka Soomaaliyeed, meel kasta oo ay joogaan iyo aragti kasta oo ay qabaan, la dareensiiyo hayb qaran oo ka weyn qabiil iyo kala aragti duwanaansho siyaasadeed.
Cabdiraxmaan Cabdishakuur ayaa ku dooday in khudbadihii xalay ay muujiyeen farqiga u dhexeeya hoggaamiye qaran oo mideeya shacabka iyo siyaasi uu sheegay inuu xilka ku helay nasiib, isagoo ku eedeeyay madaxda dowladda inay munaasabadda u adeegsadeen difaac siyaasadeed, weerarka mucaaradka iyo kasbashada taageerayaashooda.
Ugu dambeyn, wuxuu ku baaqay in Soomaaliya ay u baahan tahay hoggaan mideeya shacabka, dhegeysta tabashadooda, isla markaana ku hoggaamiya aragti qaran iyo hoggaan wanaagsan, halkii laga abuuri lahaa kala qaybsanaan siyaasadeed.
