Wararka laga helayo gobolka Gedo ayaa sheegaya in tiro badan oo ka tirsan dagaalyahannada Al-Shabaab lagu arkay deegaano dhowr ah oo ku hareeraysan magaalada Baardheere, xilli ciidamada dowladda Soomaaliya ay magaalada ka wadaan diyaar-garow ciidan.
Ilo deegaanka iyo kuwa amniga ayaa sheegay in dagaalyahanno ka tirsan kooxda lagu arkay dhulka miyiga ah ee ku dhow Baardheere maalmihii lasoo dhaafay, taasoo sare u qaadday walaaca laga qabo weerar ay kooxda ku qaaddo magaalada.
Dhaqdhaqaaqan ayaa kusoo beegmaya xilli ciidamo dheeraad ah oo ka tirsan Ciidanka Xoogga Dalka Soomaaliyeed la geeyay Baardheere, iyadoo dowladda federaalka ay qorsheyneyso in magaalada laga sameeyo saldhig ciidan oo laga abaabulo howlgallo ka dhan ah Al-Shabaab.
Qorshaha ayaa la sheegay inuu yahay in Baardheere loo adeegsado saldhig muhiim ah oo ciidamada dowladda ay ka bilaabaan howlgallo ka dhan ah fariisimaha Al-Shabaab ee ku yaalla qaybo ka mid ah gobolka Jubbada Dhexe.
Maalmo ka hor waxaa Baardheere gaaray wafdi saraakiil ciidan ah, waxaana la sheegay in halkaasi ay ka socoto diyaarinta ciidamo cusub oo la qorayo lana tababarayo si ay uga qeyb qaataan gulufka la qorsheynayo.
Taliyaha Ciidanka Dhulka Xoogga Dalka Soomaaliyeed, Sareeye Guuto Sahal Cabdullaahi Cumar, ayaa dhawaan hoggaaminayay wafdi ciidan oo gaaray magaalada Baardheere, iyadoo booqashadiisa lala xiriirinayo dardar-gelinta qorshayaasha ciidamada dowladda.
Wararka cusub ayaa muujinaya in Al-Shabaab ay isku dayeyso inay ciidamadeeda kusoo dhoweyso magaalada, iyadoo laga cabsi qabo in kooxda ay doonayso inay carqaladeyso diyaar-garowga dowladda ka hor inta uusan bilaaban howlgalka ballaaran.
Baardheere ayaa ah magaalo istiraatiiji ah oo ku taalla hareeraha webiga Jubba, waxayna isku xirtaa qaybo ka mid ah gobolka Gedo iyo deegaano dhaca dhanka koonfureed ee Soomaaliya.
Haddii dowladda ay si buuxda ula wareegto gacan ku haynta Baardheere, magaalada waxay noqon kartaa meel muhiim u ah isku dubbaridka iyo sahayda ciidamada ku wajahan deegaanada ay Al-Shabaab ku xooggan tahay.
