Gabar dhallinyaro ah oo la sheegay inay ahayd arday ka mid ahayd ardaydii sanadkan u fariisatay imtixaanka qaranka ayaa lagu waramayaa in shalay lagu toogtay magaalada Baydhabo, sida ay sheegayaan wararka hordhaca ah.
Wararka laga helayo dhacdada ayaa is khilaafaya. Qaar ka mid ah ilo-wareedyada ayaa sheegaya in askariga lagu tuhunsan yahay dilka uu isku dayay inuu kufsado gabadha ka hor inta uusan rasaas ku furin, halka warar kale ay tilmaamayaan in dhacdadu ay la xiriirtay muran ka dhashay taleefan gacanta ah oo la sheegay in la xaday. Ilaa hadda, hay’adaha ammaanka si rasmi ah uma xaqiijin sababta dhabta ah ee ka dambeysay dilka.
Laamaha ammaanka ee Baydhabo ayaa gacanta ku dhigay askariga lagu tuhunsan yahay inuu geystay falkaasi, waxaana la sheegay in baaritaan lagu hayo si loo caddeeyo duruufaha ku xeeran dhacdada.
Gabadha la dilay ayaa la sheegay inay ka mid ahayd ardaydii sanadkan u fariisatay imtixaanka qaranka. Dhacdadan ayaa dhalisay caro iyo murugo, iyadoo bulshada ay sugayaan natiijada baaritaanka iyo tallaabada sharci ee laga qaadi doono askariga la xiray.
