Muqdisho (Banaadir24) — Madaxweynaha maamulka Koonfur Galbeed Sheekh Aadan Maxamed Nuur (Aadan Madoobe) ayaa la sheegay inuu ka baxay magaalada Baydhabo, isla markaana uu hadda ku sugan yahay hoteel ku yaalla agagaarka garoonka diyaaradaha Aadan Cadde ee magaalada Muqdisho, sida ay Banaadir24 u sheegeen ilo xog-ogaal ah.
Xogta ay Banaadir24 heshay ayaa tilmaamaysa in bixitaanka Aadan Madoobe uu ku soo aadayo xilli xaaladda amni iyo siyaasadeed ee Koonfur Galbeed ay wajahayo isbeddello waaweyn, iyadoo dhaqdhaqaaqyada ciidamada iyo loollanka siyaasadeed ee gobolka ay sii xoogeysanayaan.
Dhanka kale, ilo xog-ogaal ah ayaa Banaadir24 u sheegay in Madaxweyne Xasan Sheekh Maxamuud uu ka fikirayo beddelka Aadan Madoobe, isaga oo qiimeynaya shaqsiyaad kale oo awood u yeelan kara hoggaaminta iyo difaaca Koonfur Galbeed, xilli ay jiraan walaacyo la xiriira xaaladda amni ee Baydhabo iyo deegaannada ku xeeran.
Weli ma cadda shaqsiyaadka la tixgelinayo, mana jiro war rasmi ah oo xaqiijinaya in go’aan kama dambays ah laga gaaray beddelka Aadan Madoobe.
Haddii xogtan la xaqiijiyo, waxay muujin kartaa isbeddel siyaasadeed oo muhiim ah oo ku wajahan hoggaanka Koonfur Galbeed, xilli mustaqbalka maamulka iyo xaaladda Baydhabo ay noqdeen arrimo si dhow loola socdo.
